23 maýsymnan iri qara men usaq maldy eksporttaýǵa kvota engiziledi

ASTANA. QazAqparat – Mınıstr Erbol Qarashókeev «Aýyl sharýashylyǵy janýarlaryn QR aýmaǵynan áketýdiń keıbir máseleleri týraly» buıryqqa qol qoıdy, dep habarlaıdy QazAqparat tilshisi.

«Qazaqstan aýmaǵynan úshinshi elder men Eýrazııalyq ekonomıkalyq odaq elderine 60 000 bas tiri iri qara maldy jáne 120 000 bas tiri qoı men eshkini áketýge 6 aı merzimge kvota engizilsin», - delingen vedomstvo basshysy qol qoıǵan buıryqta.

Belgilengen sandyq shekteýden asyp ketken jaǵdaıda, janýarlar karantınge qoıylady jáne quzyrly organ olarǵa veterınarııalyq sertıfıkat berýdi buǵattaıdy.

Qujatqa sáıkes, buqalardy karantınge qoıý úshin lımıt 60 myń bas. Onyń ishinde:

- bordaqylaý alańdary úshin – 30 000 bas;

- taýar óndirýshiler úshin – 30 000 bas.

Al erkek toqtylardy karantınge qoıý úshin lımıt 120 myń bas. Onyń ishinde:

- bordaqylaý alańdary úshin – 30 000 bas;

- taýar óndirýshiler úshin – 90 000 bas.

«Qazaqstan aýmaǵynan buqalardy áketýge kvota alý úshin bir bordaqylaý alańyna arnalǵan lımıttiń jıyntyq mólsheri 500 bastan aspaıdy. Al taýar óndirýshi úshin 200 bastan kóp bolmaýy tıis. Erkek toqtylardy áketýge kvota alýǵa úshin bir bordaqylaý alańyna arnalǵan lımıttiń jalpy kólemi – 1 000, bir taýar óndirýshi úshin 500 bastan aspaýy qajet», - dep jazylǵan qujatta.

Buıryq 23 maýsymnan bastap kúshine enedi.