23 elde eGov.kz portalynyń 5 túrli jańa qyzmeti qoljetimdi
Bul týraly Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın halyq aldyndaǵy esep berý kezdesýinde aıtty.
«Qazir álemniń 23 elindegi kez kelgen qazaqstandyq neke qııýǵa nemese buzýǵa, týýdy, qaıtys bolýdy jáne atyn, tegin, ákesiniń atyn ózgertýge qatysty qujattardy eGov.kz portaly arqyly bere alady. Elder tizimi keńeıedi. Sondaı-aq pasporttar berý protsesin oılastyryp jatyrmyz. Búginde qujattardy daıyndaý merzimi – 80 kún. Bul aqparattyq júıelerdiń joqtyǵymen jáne qujattardyń dıplomatııalyq poshtamen jiberiletinimen baılanysty. Máskeý elshiliginde pılottyq joba iske qosyldy. Onyń arqasynda atalǵan merzim 30 kúntizbelik kúnge deıin qysqardy. Sheteldik mekemelerde baza ornatylady, qujatty berýdi 18 kúnge deıin jedeldetetin bolamyz», - dedi Baǵdat Mýsın.