22 naýryz kúni astanalyqtar birqatar kontserttik baǵdarlamalardy tamashalaı alady

ASTANA. QazAqparat - Ulystyń Uly kúni Kongress-holl saraıynda «Án men ánshi» dástúrli kontserttik baǵdarlamasy shymyldyǵyn ashady. Al «Qazaqstan» ortalyq kontsert zalynda aqyn Serikzat Dúısenǵazınniń «Perzent tilegi» atty shyǵarmashylyq keshi ótedi.

Sondaı-aq 21, 22 naýryz kúnderi saǵat 10.00-16.00 aralyǵynda «Qazaq eli» monýmenti alańynda halyqtyq saýyq pen merekelik kontsert uıymdastyrylady.

Bul kontserttik baǵdarlamada T.Asar, A.Oqapov, «MýzART», «Jigitter», «KeshYOU», «Qońyr», «AssyL», «The Jigits» toptary, D.Qudaıbergen, «Sazgen Sazy» folklorlyq ansambli, «Shattyq», «Saltanat», «Wake-up», «Sholpan» bı ujymdary, «Eligaı» eresekter hor óner kórsetedi. Ártisterdiń án qorjyny zamanaýı ánderimen qosa, ejelden ulttyq mádenıettiń ózegi sanalǵan jyraýlardyń termelerimen, halyq ánderimen erekshelenbek.

Halyqtyq saýyq kezinde túrki halyqtarynyń ulttyq taǵamdary festıvali men «Álemdik kórkemsýret jáne kóktem jaıly plenerlyq mýzyka» ınstallıatsııasy qoıylady. Sondaı-aq atalmysh alańda «Kúres», «Asyq atý» sporttyq saıystary uıymdastyrylyp, usta-sheberlerdiń buıymdary kórmege jaıylady.

Al saǵat 10.00-16.00 aralyǵynda ákimdik aldyndaǵy alańda merekelik shara óz jalǵasyn tappaq. Alańǵa jınalǵandar ystyq baýyrsaqtan dám tatyp, sportyq saıystarda baq synaı alady. Sonymen qatar kópshilik nazaryna teatrlandyrylǵan kórinister usynylmaq.

Keshki saǵat 19.00-de ákimdik aldyndaǵy alańda Naýryz merekesine arnalǵan kontsert pen bı keshi ótedi. Oǵan «Jigitter», «Dabyl» , «Retro», «Jalyn» toptary, Marjan Arapbaeva, Jadı, Medet Shaıkenov, Rústem Júginisov syndy otandyq estrada juldyzdary qatysady, dep kútilýde.