21 jastaǵy qazaqstandyq dızaıner Londonda óz toptamasyn tanystyrdy

Qazaqstandyq jas dızaıner Laal Avgambaeva Londonda ótken Silk Road Fashion sán qoıylymynda óz toptamasyn tanystyrdy, dep habarlaıdy QazAqparat tilshisi.

Senbi kúni Londonnyń 250 jyldyq tarıhy bar De Vere Grand Connaught Rooms qonaqúıiniń úlken zalynda Ázerbaıjan, Ulybrıtanııa, Qazaqstan jáne Qyrǵyzstannan kelgen dızaınerler brıtandyq talǵampaz jurtshylyqty tańqaldyryp, shabyttandyrdy.Sán kórsetilimin 2018 jyldan beri Londonda Silk Road Fashion sán qoıylymyn ótkizip júrgen qazaqstandyq prodıýser Alma Fame uıymdastyrdy. Sán kórsetiliminiń basty maqsaty - ıdeıa almasý, Jibek joly elderiniń dızaınerlerin ilgeriletý jáne álemdik sán qaýymdastyǵyn damytý.

Silk Road Fashion sán kórsetilimi sán áýesqoılarynyń armandary men qııaldaryn júzege asyrdy.
Aıta ketsek, bul kúnderi Ulybrıtanııa astanasynda jahandyq sán ındýstrııasynyń basty oqıǵalarynyń biri – London sán aptalyǵy ótýde.
Sán tilimen beınelengen qazaq tarıhy men ulttyq mádenıeti qazaqstandyq kýtıýre, 21 jastaǵy Laal Avgambaevanyń toptamasynan kórinis tapty.
Kóshpendilerdiń ómir salty men Uly dala tabıǵatynan shabyt alǵan qazaqstandyq modelerdiń Ulybrıtanııa astanasyna jol shyǵynyn talantty jastarǵa arnalǵan «JASSTAR GRANTS PROGRAM» granty ishinara ótedi.

Onyń sán kórsetiliminde usynǵan kóshpeli stılde toqylǵan kıimi erekshe tartymdylyq pen erekshelik berdi. Kóne jáne qazirgi zamannyń, dástúr men zamanaýılyqtyń, dala sáni men kóshe stıliniń úılesimi qazaqstandyq dızaınerdiń toptamasyn erekshe etti.
T.Júrgenov atyndaǵy Qazaq ulttyq óner akademııasynyń kolledjin támamdaǵan L.Avgambaeva sán kórsetilimine qatysýyn sheteldik áriptesterimen pikir almasý ǵana emes, sonymen qatar Londonda bilim alý úshin aqsha tabý josparymen túsindirdi.
«Men London óner ýnıversıtetinen shaqyrtý aldym. Bul JOO meni úsh jyldan beri oqýǵa shaqyrady, biraq osy ýaqyt boıy oqýǵa aqsha jınaýǵa tyrystyq. Ókinishke qaraı, bul áli múmkin bolmady. Oqý men úshin óte mańyzdy, bul meniń armanym», - dedi ol.
Jurtshylyq jas dızaınerdiń toptamasyna rıza bolyp, onyń ınnovatsııalyq tásilin, joǵary sapaly oryndalýyn jáne dástúrli elementterdi zamanaýı trendtermen úılestire bilýin atap ótti.
Silk Road Fashion-ǵa qatysqan basqa dızaınerlerdiń jumystary da ózindik ereksheligimen, talǵampazdyǵymen erekshelendi. Senbi kúni keshte árbir toptama emotsııaǵa toly oqıǵaǵa aınalyp, sánniń ómirimizdegi mańyzdylyǵyn taǵy bir márte atap ótti.