21 mln teńge jymqyrǵan Olımpıadalyq daıarlaý ortalyǵynyń basshysy sottaldy
12:49, 17 Qyrkúıek 2019
NUR-SULTAN. QazAqparat – Velosıped sportynan olımpıadalyq daıarlaý ortalyǵynyń dırektory sottaldy, dep habarlaıdy QazAqparat Sybaılas jemqorlyqqa qarsy is-qımyl agenttigine silteme jasap.
«Budyn buryn Sybaılas jemqorlyqqa qarsy is-qımyl agenttigi Velosıped sportynan Olımpıadalyq daıarlaý ortalyǵynyń dırektory B.O.Muqashevqa qatysty sotqa deıingi tergeý amaldaryn aıaqtaǵan bolatyn. Ol 2016-2018 jyldary júıeli túrde uıymnyń aılyq tólemaqy qorynan 21 mln teńge jymqyrdy degen kúdikke ilingen edi. Sottalýshy ortalyqta jumys istemeıtin adamdardy zańsyz jumysqa turǵyzý, jumysshylarǵa syıaqy aýdaryp, qaıta jınap alý jolymen aqsha jymqyrǵan», - delingen agenttiktiń habarlamasynda.
Sotqa deıingi tergeý amaldary kezinde Muqashev bıýdjetke keltirilgen shyǵyndy tolyǵymen ótegen.
16 qyrkúıekte Nur-Sultan qalasynyń Esil aýdandyq №2 sotynyń úkimimen Muqashev iri kólemde bıýdjet qarajatyn jymqyrǵany úshin 4 jylǵa bas bostandyǵynan aıyryldy.