Kenshiler opat bolǵan Kostenko shahtasy jaıly ne bilemiz
Internettegi málimetterge sáıkes, Qaraǵandydaǵy kómir qazatyn kásiporyn I.A. Kostenko atyndaǵy shahta Qaraǵandy qalasynyń sheginde Maıqudyq jáne Jańa qala aýdandary arasynda ornalasqan. Shahta tarıhy 1934 jyldan bastaý alady. Sol jyly shahtanyń «Gıgant-A» jáne «Gıgant-B» uńǵymalary salyna bastady. 1934 jyldyń 13 tamyzynda jarty aıdan astam buryn ǵana áýe apatynan mert bolǵan «Qaraǵandykómir» tresiniń basqarýshysy, Qaraǵandy kómir basseıniniń negizin qalaýshylardyń biri Ivan Kostenkonyń esimi berilgen bolatyn. Shahtanyń uzyndyǵy - 5 400-9 500 metr, al tereńdigi - 1 550-4 750 metr.
1942 jyldyń 8 mamyrynda tolyqtaı salynyp bitpegen shahta paıdalaýǵa berildi. Ekinshi dúnıejúzilik soǵys jyldarynda ol ken óndirýdiń ýaqytsha syzbasymen jumys istep turdy. 1952 jyldyń 26 mamyrynda shahtanyń jyldyq jobalyq qýaty 750 myń tonna kómirdi quraıtyn birinshi kezeńi, al 10 jyldan keıin jyldyq qýaty taǵy da 750 myń tonnany quraıtyn ekinshi kezeńi iske qosyldy.
1968 jyldyń 1 qańtarynda Kostenko atyndaǵy shahtanyń quramyna №86/87 shahta qosylyp, jańǵyrtyldy. Nátıjesinde shahtanyń óndiristik qýaty 3 mln 200 myń tonnaǵa deıin artty. Al 1984 jyly shahta tarıhynda alǵash ret 3 mln 942 myń tonna kómir óndirilip, rekord ornatyldy. Araǵa 50 jyl salyp, 1992 jyldyń 7 mamyrynda shahta ujymy kenish tarıhyndaǵy 100 mln tonna kómir óndirý mejesine jetti. 1996 jyly shahta «ArsellorMıtall Temirtaý» AQ Kómir departamentiniń quramyna kirgen.
Internetke bul shahtaǵa qatysty ilip alarlyq málimet joqtyń qasy. «ArsellorMıttal Temirtaý» quramyna qosylǵannan beri 16,5 mln tonna kómir alǵany, 2020 jyly kenshilerdiń 1 mln tonna kómir qazyp, rekord ornatqany, 47 shaqyrymnan astam taý-ken óndirgeni jaıly tam-tumdaǵan aqparat kezdesedi.
Taý-ken tarmaǵynyń aýmaǵy 1 370 gektardy quraıdy. Ken qazý jumystary 840 myń metrlik tereńdikte, ashylǵan 8 tik uńǵymalarda 5 jumys qabatynda júrgiziledi. Shahta tosynnan kómir jáne gaz shyǵaryndylarynyń bolýyna baılanysty óte qaýipti sanalady. Barlyq kómir qabaty kómir shańynyń jarylý qaýpine baılanys qaterli. Qaýip-qaterdiń aldyn alý úshin shahtada jeldetý tásili qoldanylady.
Qazaqstan Prezıdenti Qasym-Jomart Toqaev qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi.
Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy. Sondaı-aq, «ArselorMıttalTemirtaý» kompanııasymen ınvestıtsııalyq yntymaqtastyqty toqtatý tapsyryldy.
Shahtadaǵy órt faktisi boıynsha Qylmystyq Kodekstiń 277-babynyń 3-bóligi «Taý-ken nemese qurylys jumystaryn júrgizý kezinde qaýipsizdik qaǵıdalaryn buzý» baby boıynsha sotqa deıingi tergep-tekserý bastaldy.
Professor H.J. Maqajanov atyndaǵy aýrýhanalarǵa 18 adam jetkizildi. Bir adam reanımatsııada jatyr.
Memleket basshysynyń tapsyrmasyna sáıkes Premer-Mınıstr Álıhan Smaıylovtyń tóraǵalyǵymen apattyń sebepterin tergeý jáne onyń saldaryn joıý jónindegi Úkimettik komıssııa quryldy.
Onyń quramyna Premer-Mınıstrdiń birinshi orynbasary Roman Sklıar, tótenshe jaǵdaılar mınıstri Syrym Sháriphanov, ishki ister mınıstri Erjan Sádenov, densaýlyq saqtaý mınıstri Ajar Ǵınııat, eńbek jáne halyqty áleýmettik qorǵaý mınıstri Svetlana Jaqypova, ónerkásip jáne qurylys mınıstri Qanat Sharlapaev, quqyq qorǵaý organdarynyń, Qaraǵandy oblysy ákimdiginiń, eńbek ınspektsııasynyń, «Qorǵaý» kómir óndirýshiler kásipodaǵynyń ókilderi jáne t.b. kirdi.
Sondaı-aq, Úkimet «ArselorMıttal Temirtaý» AQ aktsıonerlerimen aldyn ala ýaǵdalastyqqa qol jetkizilgenin jáne kásiporynnyń menshik quqyǵyn Qazaqstan Respýblıkasynyń paıdasyna berý týraly kelisimshartty rásimdeý aıaqtalý ústinde ekendigin habarlady.
15:00-degi jaǵdaı boıynsha, 28 adamnyń denesi tabyldy, 18 kenshini izdeý jalǵasyp jatyr.
16:00-degi jaǵdaı boıynsha, 32 adamnyń denesi tabyldy, 14 kenshini izdeý jumystary jalǵasyp jatyr.