21 adamnyń ómirin jalmaǵan «SKAT» ushaǵynyń apatqa ushyraýyna kináliler belgili boldy

ASTANA. QazAqparat - QR Bas kólik prokýratýrasynyń arnaıy prokýrorynyń basshylyǵyndaǵy Tergeý toby 2013 jyldyń qańtar aıynda Almaty oblysynda 16 jolaýshy men 5 ekıpaj múshesiniń qaza tabýyna sebep bolǵan «SKAT» áýe kompanııasy» AQ-nyń «CRJ-200» markaly ushaǵynyń apatqa ushyraý faktisi boıynsha sotqa deıingi tergep-tekserý amaldaryn aıaqtady.

«Qazaqstan Respýblıkasy Investıtsııalar jáne damý mınıstrliginiń komıssııasymen birlesip jáne áýe apatyn zertteýge tartylǵan sheteldik jáne otandyq áýe mamandarymen apattyń oryn alý boljamynyń barlyq múmkindigi tekserildi. Apatqa kúrdeli meterologııalyq jaǵdaıda ushý ekıpajynyń ekinshi aınalym kezinde jer betiniń durys kórinbeýine oraı tıisti áreket jasamaýy, ushaqtyń joǵary alýy úshin shtýrvaldy «ózine qaraı» qalypqa ákelmeýi sebep bolǵan», - delingen habarlamada.

Vedomstvo aqparatyna qaraǵanda, ushýdyń sońǵy mınýttarynda, jer ústine jaqyndaǵandyqty bildiretin bort kompıýteriniń eskertý dabyly qosylǵan ýaqytta, jumys qabilettiligin ishinara joǵaltqan áýe kemesiniń komandıri ushaqty basqarmaǵan, al ekinshi ushqysh qurylǵylardyń parametrlerine baqylaý jasaýdyń ornyna, dıspetchermen radıobaılanys ornatýmen álek bolǵan.

Komıssııa ekıpaj aralarynda ishkikabınalyq kommýnıkatıvtik ózara baılanystyń jetkiliksizdigin, olardyń bortkompıýteriniń eskertýine áreket etpegendikterin, sondaı-aq ushý quramynyń medıtsınalyq tekserýden ótý talaptaryn oryndamaǵanyn atap ótken. Aıta keterligi, áýe kemesiniń komandıri tekserýsiz jáne otadan keıingi ońaltý kezeńsiz ushaqty basqarǵan.

Qozǵalys qaýipsizdigi men áýe kóligin paıdalaný erejesiniń buzylýyna jol bergenderi úshin ushý ekıpajynyń múshelerine qatysty qylmystyq is olardyń mert bolýlaryna baılanysty qysqartyldy. Sonymen qatar, ushqyshtardyń jibergen kemshilikteri men Avıakompanııanyń ushý jumysyn jetkiliksiz uıymdastyrýynda da tikeleı sebep, baılanys bar.

Ushý ekıpajy Qazaqstan qoldamaǵan sheteldik oqý ortalyǵynda bilim alǵan; ushqyshtar aldyn ala daıyndyq jáne biliktilik arttyrý kýrstarynan ótpegen, avıakompanııa únemi, sonyn ishinde oqıǵa bolatyn kúni ushqyshtardyń eńbek jáne demalý rejimderin saqtamaǵan.

Atalǵan jumys salasyna Avıakompanııanyń ushý qyzmetiniń dırektory jaýapty. Qazaqstan Respýblıkasy Qylmysty kodeksiniń 344 babynyń 3 bóligimen kúdikti retinde tanylǵan Avıkompanııanyń ushý qyzmeti dırektoryna qatysty qylmystyq is 2015 jylǵy 10 jeltoqsanda Almaty qalasy Almaly aýdandyq sotyna joldandy.