2050 jylǵa qaraı Syrdarııa sýy 5% azaıady – Ózbekstan sarapshysy

ASTANA. QazAqparat – Ózbekstan Respýblıkasynyń Prezıdenti janyndaǵy Strategııalyq jáne óńiraralyq zertteýler ınstıtýtynyń dırektory Eldor Arıpovtyń aıtýynsha, 2050 jylǵa qaraı Ortalyq Azııa elderi azyq-túlik qaýipsizdigi máselesimen betpe-bet kelýi múmkin, dep habarlaıdy QazAqparat tilshisi.

«Ortalyq Azııa-2030: Bolashaqtyń kelbeti» atty sarapshylar kezdesýinde ózbek sarapshysy osyndaı oı aıtty.

«Sarapshylardyń sózine sensek, aýa temperatýrasynyń ósý qarqyny jyl saıyn óse beretin sııaqty. Bul nege ákep soqtyrýy múmkin? Qazirdiń ózinde bárimizdiń jerimizdiń shóleıttenýi, Qyrǵyzstan men Tájikstandaǵy muzdyqtardyń azaıýy sııaqty óte salmaqty degradatsııalarǵa ákelip jatyr. Bul muzdyqtar – óńirge qajet sýdyń negizgi kózi», - degen Ózbekstan ókili sarapshylardyń óńirdegi klımattyq ózgerister týraly boljamyna toqtaldy.

«Mamandar 2050 jylǵa qaraı Ámýdarııanyń sý aǵyny 15 paıyz, Syrdarııanyń sý aǵyny 5 paıyz qysqarady degendi aıtyp júr. Bul aýyl sharýashylyǵyndaǵy ónimdiliktiń tómendeýine ákelmeı qoımaıdy.

Taǵy sol baǵalaýlar boıynsha aýyl sharýashylyǵyndaǵy ónimdilik kólemi 2050 jylǵa qaraı 30 paıyz azaıýy múmkin. Bul azyq-túlik qaýipsizdiginiń máselesin týyndatady. ıAǵnı, osy bir ekologııamen, klımattyń ózgerýimen, sý tutynýmen baılanysty tutas problemalar shoǵyry bizden sheshim talap etetin ózekti másele bolyp tur», - deıdi Eldor Arıpov.