2050 jylǵa qaraı eńbekke qabiletti halyq sany 3,5 mln adamǵa ósedi

ASTANA. QazAqparat – 2050 jylǵa qaraı eńbekke qabiletti halyq sany 3,5 mln adamǵa deıin ulǵaıady. Bul «Ashyq» NQA portalynda jarııalaǵan «Eńbek naryǵyn damytýdyń 2028 jylǵa deıingi keshendi josparyn bekitý týraly» Úkimet qaýlysynda jazylǵan, dep habarlaıdy QazAqparat tilshisi.

«2050 jyly boljamdy halyq sany 27,8 mln adamǵa jetedi. Al megapolısterdiń halqy 2 esege ósedi. 2030 jylǵa qaraı jumys kúshiniń jyl saıynǵy ósimi shamamen 100 myń adamdy quraıdy. Aǵymdaǵy úrdisterdi saqtaı otyryp, óńirlik teńgerimsizdikter kúsheıtiletin bolady. 2050 jylǵa qaraı eńbekke qabiletti jastaǵy halyq sany 3,5 mln adamǵa ósedi. Ýrbanızatsııa jyldamdyǵy jedeldeıdi. Bul megapolıs turǵyndarynyń 2 ese ulǵaıýyna ákeledi. Qala halqynyń tez ósýi áleýmettik margınaldaný qaýpine ákep soǵýy yqtımal», - dep kórsetilgen keshendi josparda.

Sonymen qatar qujatta 2021 jyly mindetti zeınetaqy jarnalarynyń mólsherin baǵalaý kezinde resmı jumys isteıtin azamattardyń jartysyna jýyǵy 110 myń teńgeden tómen tabys tapqany jazylǵan. Eńbek mınıstrliginiń málimetine saı, bul azamattar «jumys isteıtin kedeıler» bolyp sanalady.

Qosa ketsek, joǵaryda atalǵan máselelerdi sheshý úshin mınıstrik Eńbek naryǵyn damytýdyń 5 jyldyq josparyn bekitýdi usynyp otyr.