2050 jylǵa deıin tómen kómirtekti ekonomıkaǵa aýysýymyz kerek – Ekologııa mınıstri
«Bıyl jańa Ekologııalyq kodeks qabyldandy. Munyń óte zamanaýı jáne reformatorlyq qujat ekenin aıtqym keledi. Rasynda da óte mazmundy kodeks shyqty. Ondaǵy barlyq novellalardy sapaly jáne ýaqtyly júzege asyra alsaq, oń ózgeristerdi kóremiz. Ekologııalyq kodekste belgilengen barlyq normalar birinshi kezekte taza aýa, qaldyqtardy qaıta óńdeý sııaqty ózekti máselelerdi sheshýge baǵyttalǵan. Klımattyq ózgerister problemasyna oralsaq, munda basqasha jumys isteý kerek. Tómen kómirtekti damýǵa kóshý qajet», - dedi Maǵzum Myrzaǵalıev Halyqaralyq jasyl tehnologııalar jáne ınvestıtsııalyq jobalar ortalyǵynda ótken jastarmen kezdesýde.
Ekologııa mınıstri ótken jyly 2050 jylǵa deıingi tómen kómirtekti ekonomıka tujyrymdamasyn daıyndaý boıynsha belsendi jumys bastalyp ketkenin eske saldy.
«Bul óte kúrdeli jáne qıyn jumys. Bizdiń barlyq energetıkamyzdyń 70% - kómirge tıesili. Sáıkesinshe, kómirden bas tartý ońaı emes. Bul qarjylyq salymdy qajet etetin qıyn mindet. Biraq bul máselelerdi sheshýimiz kerek jáne 2050 jylǵa deıin tómen kómirtekti ekonomıkaǵa aýysyp, 2060 jylǵa qaraı – kómirtekti beıtaraptyq dep atalatyn birqatar elderge qosylýymyz kerek», - dep atap ótti M. Myrzaǵalıev.
Aıta keteıik, QR Ekologııa, geologııa jáne tabıǵı resýrstar mınıstri Maǵzum Myrzaǵalıev Dúnıejúzilik qorshaǵan ortany qorǵaý kúni qarsańynda ekovolonterlermen, ekologııalyq fakýltetterdiń stýdentterimen kezdesti jáne Qazaqstandaǵy basty ekologııalyq problemalar týraly aıtyp berdi.