2050 jyldarǵa qaraı elimizdiń soltústik óńiri halqynyń sany 30 paıyzǵa deıin azaıýy múmkin
«Elimizde qalyptasqan demografııalyq ahýal, onyń ishinde soltústik óńirlerdegi halyqtyń depopýlıatsııasy, ýrbanızatsııasy, týýdyń tómendeýi máselesi qanshama jyldan beri kóterilip keledi. Soǵan baılanysty ońtústikten soltústikke qonys aýdarý memleket baǵdarlamasy qabyldandy. Alaıda, bul baǵdarlama tıisti nátıje bermeı otyr. Óıtkeni, osy salada ǵylymı tujyrymdalǵan zertteýler joq desek te bolady. Biz kóbine sandyq málimettermen, «osynsha adamdy kóshirdik», «osynshama qarjy bóldik», «osynshama adam keldi» degen sııaqty derektermen shektelemiz. Biraq, nátıjesi belgisiz. ıAǵnı, kóp jaǵdaıda tipti «kóship kelgen adamdar qalaı ornalasty», «qanshasy keri kóship ketti», «olardyń jaǵdaıy qandaı», «olar belgili bir dárejede kelesi kóshi-qon aǵynyna oń áser bere aldy ma», «oblystyń eńbek tapshylyǵy máselesin sheshýge úlesin qosa aldy ma» degen sııaqty kóptegen másele qarastyrylmaıdy», - dedi ǵalym.
Onyń atap ótýinshe, osyǵan oraı «Qazaqstan Respýbılkasynyń soltústik óńirlerindegi demografııalyq ahýal: demografııalyq taldaýdyń modelderi men ádisteri» taqyrybynda úsh jyldyq zertteý júrgizilgen.
«Nátıjesinde beligili bir tujyrymdar jasadyq. Árıne, bul barlyq máseleni sheship tastaıdy dep aıta almaımyz. Degenmen, ǵylymı-zertteý júrgizý, arnaıy sol óńirlerdi aralaý, kóship kelgen aǵaıyndarmen sóılesý jáne oblysta qalyptasyp otyrǵan demografııalyq ahýalǵa zertteý júrgizý, sarapshylardy tartý arqyly belgili bir dárejede tujyrymǵa keldik. Soltústik óńirlerdegi halyq sanynyń jyl saıyn tómendeýi baıqalady. Máselen, 10 myń adam kóship kelse, 18 myń adam kóship ketedi. Demografııalyq boljamdarǵa qaraǵanda, 2050 jyldarǵa qaraı bul óńirdiń halyq sany 30 paıyzǵa deıin kemýi múmkin», - dedi Qaırat Bodaýhan.
Osyǵan deıin Premer-Mınıstr Oljas Bektenov Senat depýtattarynyń demografııa máseleleri boıynsha memlekettik organ qurýǵa qatysty saýalyna jaýap bergenin jazdyq.