2040 jyldarǵa qaraı Qazaqstandaǵy sý tapshylyǵy 12-15 mıllıard tekshe metrge jetýi múmkin

ASTANA. QazAqparat – 2040 jyldarǵa qaraı Qazaqstandaǵy sý tapshylyǵy 12-15 mıllıard tekshe metrge jetýi múmkin. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalaǵan Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Sý resýrsy elimizdegi ózekti máselelerdiń biri. Ásirese, sýdyń sapasy jáne onyń halyqqa qoljetimdi bolýy asa mańyzdy bolyp tur. Jyl ótken saıyn halqymyzdyń sany da, ekonomıkamyz da ósedi. Bul – qalypty qubylys. Sol sebepti 2040 jyldarǵa qaraı Qazaqstandaǵy sý tapshylyǵy 12-15 mıllıard tekshe metrge jetýi múmkin», - dedi Prezıdent.

Memleket basshysy transshekaralyq sý kózderine táýeldi el ekendigimizge nazar aýdartty.

«Eýrazııa qurlyǵyndaǵy ózender men kanaldar – barshamyzǵa ortaq tabıǵat baılyǵy. Osy sý kózderi bizdiń halyqtarymyzdy, ekonomıkamyzdy jaqyndastyrady. Sondyqtan kórshiles ári dostas eldermen bul másele boıynsha árdaıym ózara túsinistikke jáne kelisimge kelý kerek. Jan-jaqty oılastyrylǵan sý saıasatyn júrgizý, transshekaralyq sýlardy paıdalaný máselelerin sheshý – Úkimettiń aldynda turǵan asa mańyzdy mindetter», - dedi Prezıdent.