2030 jylǵa qaraı Ortalyq Azııanyń ekonomıkalyq ósimi qandaı bolady

BІShKEK. QazAqparat – Búgin Bishkekte «Eýropalyq Odaq – Ortalyq Azııa» ekonomıkalyq forýmynda Qyrǵyzstan Prezıdenti Sadyr Japarov jańartylatyn energııa kózderin damytý jospary týraly aıtty, dep habarlaıdy QazAqparat tilshisi.

«Jyl saıyn Ortalyq Azııa óńiri perspektıva, saýda-ekonomıkalyq ári ınvestıtsııalyq ózara is-qımyl turǵysynan tartymdy bolyp keledi. Dúnıejúzilik bank málimeti boıynsha 1993 jyly Ortalyq Azııa elderiniń jalpy ishki ónimi 45 mlrd AQSh dollaryn quraǵan edi, al 2019 jylǵa qaraı bul kórsetkish 8 ese ósip, 347 mlrd AQSh dollaryna jetti. 2030 jylǵa qaraı bul soma eki esege ósip, 610 mlrd AQSh dollaryna jýyqtaıdy dep kútilýde», - dedi Qyrǵyzstan Prezıdenti.

Osy oraıda ol forýmnyń maqsaty óńirler arasynda ekonomıkalyq ózara is-qımyldy damytýǵa arnalǵanyn eske saldy.

Budan bólek S. Japarov 2050 jylǵa qaraı «jasyl» damý turǵyrnamasynda Qyrǵyzstan kómirtegi beıtaraptylyǵyna jetýge tyrysatynyn aıtty. Bul rette jańaratyn energııa kózderine ekpin qoıylady. Birinshi kezekte gıdroenergetıkaǵa erekshe mán berilmek.

«2030 jylǵa qaraı Qyrǵyzstan parnıkti gaz shyǵaryndylaryn 44 paıyzǵa qysqartý maqsatyn qoıyp otyr», - dedi ol.