2030 jylǵa qaraı Qazaqstanda gaz tutyný kólemi 18 mlrd. tekshe metrge jetedi - U.Qarabalın

ASTANA. QazAqparat - 2030 jylǵa qaraı Qazaqstanda gaz tutyný kólemi 18 mlrd. tekshe metrge jetedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Energetıka birinshi vıtse-mınıstri Uzaqbaı Qarabalın málim etti.

Onyń sózine qaraǵanda, búgin Úkimette tanystyrylǵan Qazaqstandy gazdandyrýdyń bas josparyn ázirleý barysynda pessımıstik, bazalyq jáne optımıstik stsenarııler qarastyrylǵan. Eksperttik baǵalaýdyń nátıjesinde odan ary bekitýge bazalyq stsenarıı usynylǵan. Atalǵan stsenarııge sáıkes, buǵan deıin gazdandyrylǵan óńirlerge júrgizilgen sharalar eldi mekenderdi gazdandyrý barysynda qoldanylatyn bolady.

«2030 jylǵa qaraı gaz tutyný kólemi qazirgi 11 mlrd. tekshe metrden 18 mlrd. tekshe metrge deıin artatyn bolady. Mundaı jobany júzege asyrýǵa qajetti somanyń kólemi 656 mlrd. teńgeni quraıdy», - dedi U.Qarabalın.

Sondaı-aq, birinshi vıtse-mınıstrdiń sózine qaraǵanda, gazdandyrýdyń bas syzbasyn júzege asyrýdyń nıjesinde kógildir otynǵan qol jetkizgen eldi mekenderdiń sanyn 988-den 1621-ge artady. Abonentter sany 1,4 mıllıonnan 2,9 mıllıonǵa deıin kóbeıedi. Jańa gaz qubyrlary salynyp, olardyń jalpy uzaqtyǵy 28,5 myń shaqyrymnan 57,5 myń shaqyrymǵa deıin jetedi. Elimizdiń 13 oblysynyń turǵyndary kógildir otyn qyzyǵyn kóredi.