2030 jylǵa qaraı el aýmaǵynda jaýyn-shashyn 1-3% deıin azaıady

ASTANA. QazAqparat – 2030 jylǵa qaraı ortasha jyldyq jaýyn-shashyn mólsheri 1-3% tómendeýi múmkin. Mundaı derek Ashyq NQA portalynda jarııalanǵan QR Sý kodeksi jobasynyń tujyrymdamasynda keltirilgen, dep habarlaıdy QazAqparat tilshisi.

«Qazaqstan aýmaǵynda jyldyń barlyq aılarynda jer betindegi aýa temperatýrasy 0,8-1,2 gradýsqa kóterilgeni baıqalady. Sondaı-aq, 2030 jylǵa qaraı jaýyn-shashynnyń jyldyq ortasha mólsheri 1-3% tómendeıdi dep kútilýde. Búgingi tańda Qazaqstanda muzdyqtardyń tez erip jatqanyn kórip otyrmyz. Aldaǵy ýaqytta da osy qarqynmen erıtin bolsa, bul bolashaqta sý qaýipsizdigi problemalarynyń kúrt shıelenisýine ákelip soǵýy ábden múmkin. Bul búkil Ortalyq Azııa óńiri elderiniń ornyqty damýyna naqty qaýip tóndiredi», - dep kórsetilgen qujatta.

Tujyrymdamada jazylǵandaı, Qazaqstandaǵy sý daǵdarysynyń deńgeıi - 31%.

Elimizde ótken ǵasyrdyń 60-shy jyldary ózen basseınderdegi sý qorynyń ortasha jyldyq aǵyny 121,1 sharshy shaqyrym bolsa, qazir ol 102 sharshy shaqyrym.

Aldyn ala esep boıynsha 2030 jylǵa qaraı bul kórsetkish 99,4 sharshy shaqyrymǵa deıin azaıý qaýpi bar.