2030 jylǵa deıin aýany lastaıtyn shyǵaryndy 9% azaıady – Ekologııa mınıstri

NUR-SULTAN. QazAqparat – 2030 jylǵa deıin aýany lastaıtyn ónerkásip shyǵaryndysy 9,1% paıyzǵa tómendetý josparlanǵan. Bul týraly Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekshev aıtty, dep habarlaıdy QazAqparat tilshisi.

Mınıstrdiń aıtýynsha, «Jasyl Qazaqstan» ulttyq jobasyn iske asyrýǵa 89,3 mlrd teńge, onyń ishinde respýblıkalyq bıýdjetten 27,6 mlrd, jergilikti bıýdjetten 15 mlrd jáne bıýdjetten tys 46,7 mlrd teńge kózdelgen. Al bıyl ulttyq joba sharalaryn iske asyrýǵa 160,9 mlrd teńge josparlanǵan.

«Atmosferalyq aýa sapasyn jaqsartý» boıynsha bes jylda 10 iri qalada 16 iri kásiporynnyń shyǵaryndysy 20% paıyzǵa qysqartý kózdelip otyr. Byltyr 16 kásiporyn atmosferalyq aýaǵa 655 myń tonna lastaýshy zat shyǵardy, bul 803,8 myń tonna lımıt kezinde 2020 jylǵy deńgeıden 3% paıyzǵa tómen. Bıylǵy 6 aıda kásiporyndardyń emıssııalary 293,2 myń tonna boldy, bul ótken jylǵy kezeńnen 6,7% paıyzǵa tómen. Bul kórsetkishke tabıǵaty qorǵaý sharalarymen qatar ónerkásipti modernızatsııalaý esebinen qol jetkizildi. Ol úshin kásiporyndar óz qarjysynan 15,4 mlrd teńge bóldi», - dedi Ekologııa mınıstri.

Mysaly, «ArselorMıttal Temirtaý» AQ shań tazalaý jabdyqtaryn jańartyp, qazandyq agregattarynyń elektr súzgilerine jóndeý júrgizgen. Bul shyǵaryndyny 1,1 myń tonnaǵa azaıtýǵa múmkindik berdi. Áktasty usaqtaý korpýsynyń shań tazalaıtyn jabdyqtaryn qaıta qurý jáne elektr súzgilerin ornatý arqyly aglomeratty jentekteý aımaǵynyń gaz jolyn qaıta jańartý jumystary bıyl aıaqtalady. Jalpy, kásiporyn boıynsha 2025 jylǵa 30% paıyzǵa tómendetý josparlanyp otyr.

«Almatyda ekinshi jylý elektr ortylyǵyn (TETs-2) gazǵa aýystyrý josparlanǵan, bul 2025 jylǵa qaraı lastaýshy zattar shyǵaryndylaryn 80% paıyzǵa tómendetýge múmkindik beredi. Atyraý munaı óńdeý zaýytynda katalıtıkalyq krekıngtiń tútin gazyn tazalaý jáne otyn gazyn amın qyshqylymen tazartý jumystary júrgizilýde. Bul lastaýshy zattardyń shyǵaryndylaryn 3,6% paıyzǵa tómendetýge múmkindik beredi. Jalpy 2030 jylǵa deıin 9,1% paıyzǵa tómendetilmek», - dedi Serikqalı Brekeshev.