2030 jyly jasandy ıntellektiń álemdik ekonomıkaǵa úlesi $15,7 trln-ǵa jetedi

<p>ASTANA. KAZINFORM &ndash; Jasandy ıntellekt kómegimen tehnologııalardy damytý ekonomıkalyq ósimge jańa serpin beredi. Bul týraly Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Asqar Jambakın Technowomen Central Asia halyqaralyq forýmynda aıtty.</p>

«Sarapshylardyń baǵalaýynsha, 2030 jylǵa qaraı jasandy ıntellektiniń álemdik ekonomıkaǵa qosqan úlesi 15,7 trln dollarǵa deıin jetedi, bul qosylǵan qunnyń qazirgi álemdik JІÓ-men salystyrǵanda 14%-ǵa ósetinin bildiredi. Mundaı aýqymdy sandar JI tehnologııasy bizdiń bolashaǵymyzdyń ajyramas bóligi ekenin rastaı túsedi. Ol jumys pen ózara is-qımyl arqyly tóńkeris jasap qana qoımaı, ekonomıkalyq ósýge jańa serpin beredi», — dedi Asqar Jambakın forýmnyń ashylýynda.

Vıtse-mınıstr densaýlyq saqtaý salasynda jasandy ıntellektini sátti qoldanýdyń mysaly retinde stomatologııadaǵy IDent startapyn atap ótti.

Sondaı-aq, onyń aıtýynsha, JI qoldaný arqyly tsıfrlandyrý memlekettik apparatty bıýrokratııadan aryltýǵa da kómektesedi, bıznes-protsesterdi uıymdastyrýdy qamtamasyz etip, ınklıýzıvtilikti arttyrady.

«Ótken jyly bizdiń jobalarymyzdyń biri — „Otbasy“ tsıfrlyq kartasy tsıfrlyq ınklıýzııa boıynsha álemdegi eń úzdik joba atandy. Bul halyqtyń áleýmettik osal toptaryna, zeınetkerlerge jáne basqa toptarǵa 40-tan astam qyzmet kórsetýge múmkindik beredi. Oǵan qosa, elimizde JI salasyn damytý úshin jaǵdaı jasap jatrymyz. Bizde ulttyq JI platformasyn ázirleý sekildi qajetti tehnologııalyq ınfraqurylym qalyptasýda, 90-nan astam derekqor, bıznes, memlekettik organdar men ǵalymdar úshin qoljetimdi bolatyn úlken kólemdegi aqparatty óńdeı alatyn qýatty sýperkompıýter ıntegratsııalanǵan», — dep tolyqtyrdy Asqar Jambakın.

Sonymen birge, BUU janyndaǵy Halyqaralyq telekommýnıkatsııa odaǵynyń Bas hatshysy Dorın Bogdan-Martın búginde JI salasynda jumys isteıtin mamandardyń 21% áıelder ekenin atap ótti.

«25 sáýir — aqparattyq-kommýnıkatsııalyq tehnologııalar salasyndaǵy áıelder kúni. Búginde JI salasyndaǵy qyzmetkerlerdiń 21% — áıelder. Áıelder uzaq ýaqyt boıy memlekettik organdardyń joǵary laýazymdarynyń kóp bóligin ıelenbedi. Biz bul kórsetkishterdiń qandaı az ekenin kórip otyrmyz. Qazir ony ózgertetin ýaqyt keldi. Óıtkeni tehnıkalyq ortalyqqa ınnovatsııalyq ıdeıalar, kreatıv pen búkil adamzatty jaqsartýǵa baǵyttalǵan áıelderdiń sheshimderi qajet. Sondaı-aq, jas qyzdardy ártúrli ilimder men tálimgerlik kýrstarymen yntalandyrý jáne olardy shabyttandyrý mańyzdy, óıtkeni olar bizdiń bolashaǵymyzdyń kóshbasshylary», — dedi BUU ókili beınetranslıatsııada.

Aıta keteıik, Astanada jasandy ıntellekt taqyrybyna arnalǵan «Technowomen Central Asia» halyqaralyq forýmy ótip jatyr.  

Buǵan deıin jasandy ıntellekt mamandyqtardy qalaı ózgertetini týraly sarapshy pikiri aıtylǵan edi.