2030 jylǵa qaraı qazaqstandyq porttardyń ótkizý qabiletin 30 mln tonnaǵa deıin ulǵaıtamyz – mınıstr

<p>ASTANA. KAZINFORM &ndash; Bul týraly QR Kólik mınıstri Marat Qarabaev Mańǵystaý oblysyndaǵy teńiz porttaryn damytý josparynyń iske asyrylýyn tekserý barysynda málim etti, dep habarlaıdy mınıstrliktiń baspasóz qyzmeti.</p>

Baspasóz málimetterine qaraǵanda, Kólik mınıstri Marat Qarabaev Mańǵystaý oblysyna jumys sapary aıasynda Kaspııdegi iri kólik ınfraqurylymynyń áleýetin baǵamdady. Mınıstr Aqtaý, Quryq, Baýtıno teńiz porttary men Sarja, Ertaı, Severnyı teńiz termınaldarynyń jumysyn tekserdi.

Teńiz ınfraqurylymyn damytý aıasynda qosymsha konteınerlik termınaldar salý, qaıta tıeý tehnıkasyn jańartý, logıstıkany damytý, kedendik jáne ákimshilik rásimderdi ońaılatý, sondaı-aq THKB jáne Soltústik-Ońtústik dálizderin tsıfrlandyrý jumystary atqarylýda.

Jalpy, osy jumysty iske asyrý qorytyndysy boıynsha 2030 jylǵa qaraı qazaqstandyq porttardyń ótkizý qabiletin aǵymdaǵy 21 mln tonnadan 30 mln tonnaǵa deıin ulǵaıtý josparlanyp otyr. Atalǵan jumystar Transkaspıı halyqaralyq kólik baǵytyn damytý sheńberinde qabyldanatyn keshendi sharalardyń bir bóligi bolyp tabylady jáne osy marshrýtta júkterdi tasymaldaý boıynsha ósip kele jatqan qajettilikterge qyzmet kórsetýdi qamtamasyz etýge múmkindik beredi.

«Máselen, Quryq porty akvatorııasynyń túbin tereńdetý jumystary júrip jatyr. Mamandar port túbin bir jarym-eki metrge tereńdetedi. Jumystarǵa iri eýropalyq Jan De Nul kompanııasynyń arnaıy tehnıkasy jumyldyryldy. Dál osyndaı jumystar Aqtaý portynda da júrgiziledi. Jumys sapary barysynda mınıstr Baýtıno teńiz portynyń akvatorııasyndaǵy kemeler qozǵalysyn basqarý júıesiniń jumysymen de tanysty. Bul júıe navıgatsııalyq qaýipsizdigin qamtamasyz etedi jáne teńizde apattardyń týyndaý qaýpiniń aldyn alady. Júıe bıylǵy jyldyń tamyz aıynda Quryq teńiz portynyń akvatorııasynda iske qosyldy. Al kelesi 2025 jyly Aqtaý portynda da dál osyndaı júıe iske qosylady dep josparlanýda»,-delingen habarlamada.

Bul sharalardy iske asyrý SOLAS-74 halyqaralyq konventsııasynyń talaptaryna sáıkes Kaspıı teńiziniń qazaqstandyq sektorynda navıgatsııalyq qaýipsizdikti qamtamasyz etýge múmkindik beredi.

Esterińizge sala keteıik, Transkaspıı halyqaralyq kólik baǵyty boıynsha júkterdi tasymaldaý kólemi 7 aıda 62% - ǵa ulǵaıyp, 2,5 mln. tonnany qurady (2023 jyldyń sáıkes kezeńinde bul kórsetkish 1,6 mln.tonnaǵa teń boldy).