2030 jylǵa deıin 15 mlrd dollarǵa jańa joldar salynady

<p>ASTANA. KAZINFORM &ndash; 2030 jylǵa deıin elimizdiń aýmaǵynda 4,7 myń shaqyrym jańa jol salynady. Bul týraly Kólik mınıstrliginen málim etti.</p>

«Kólik-tranzıttik áleýetti odan ári damytý jáne kólik ınfraqurylymyn jańǵyrtý aıasynda 2024-2030 jyldary kezeńinde jalpy uzyndyǵy 4,7 myń shaqyrym bolatyn jańa jobalardy kezeń-kezeńimen iske asyrýdy bastaý josparlanǵan. Jobalardyń boljamdy quny 15 mlrd dollardy quraıdy jáne 3 kezeńde iske asyrylatyn bolady», - dep atap ótedi mınıstrlik agenttiktiń resmı saýalyna bergen jaýabynda.

Vedomstvo málimetinshe, birinshi kezeńde jobalardy iske asyrýdy 2024 jyldan bastaý kózdelgen. Onda myna joldardyń qurylysy bastalady:

- Qyzylorda-Jezqazǵan (208 shaqyrym) (Ulytaý oblysy boıynsha ýchaske);

- Aqtóbe-Qyzylorda (742 shaqyrym) (Aqtóbe-Ulǵaısyn – 262 shaqyrym, Qyzylorda-Sekseýil - 480 shaqyrym ýchaskeleri);

- Qaraǵandy-Jezqazǵan (513 shaqyrym);

- Saryaǵash qalasyn aınalyp ótý (102 shaqyrym);

Ekinshi kezeńde 2024 jyldan 2026 jylǵa deıingi kezeńde qurylys-montajdaý jumystaryn myna ýchaskelerde bastaý josparlanǵan:

- Atyraý-Dossor (86 shaqyrym);

- Astana-Qostanaı-RF shekarasy (830 shaqyrym);

- Atyraý-Oral (320 shaqyrym) (Atyraý-Inder, Oral-Chapaevo ýchaskeleri);

- Túrkistan qalasyn aınalyp ótý (30 shaqyrym).

Úshinshi kezeń 2026 jyldan keıin uzyndyǵy 1 434 shaqyrym qalǵan jobalardy jańǵyrtýdy kózdeıdi.

«Qarjylandyrý tapshylyǵyn eskere otyryp, qozǵalys qarqyndylyǵy tómen jekelegen jobalar boıynsha qurylymdy kúsheıte otyryp jáne 4 jolaqqa deıin (Pavlodar-Ýspenka, Semeı-Barnaýl - 265 shaqyrym) keńeıtý múmkindigimen jóndeý júrgizý usynylady», - dedi Kólik mınıstrliginen.