2027 jylǵa deıin 84,6 mlrd dollardyń taýaryn eksporttaımyz – mınıstrlik

NUR-SULTAN. QazAqparat – Qazaqstan 2027 jylǵa deıin 84,6 mlrd dollardyń taýaryn eksporttap, 53,5 mlrd dollardyń ımportyn tutynbaqshy. QR Ulttyq ekonomıka mınıstri Álibek Qýantyrov Úkimet otyrysynda osyndaı boljam aıtty, dep habarlaıdy QazAqparat tilshisi.

«Bıýdjettik josparlaý úshin negiz retinde bazalyq stsenarııdi paıdalaný usynylady. Osy stsenarııge sáıkes jalpy ishki ónimniń naqty ósýi 2023 jylǵy 4,0%-dan 2027 jyly 4,2 %-ǵa deıin jedeldeıdi.

Nomınaldy jalpy ishki ónim 120,7 trln teńgeden 176,6 trln teńgege deıin ósedi.

Ekonomıkanyń barlyq bazalyq salalarynda oń ósý kútilýde.

Máselen, ónerkásipte ortasha jyldyq ósý qarqyny 3,1 %-dy, onyń ishinde óńdeý ónerkásibinde – 3,5%-dy, taý-ken óndirý ónerkásibinde – 2,9%-dy quraıdy. Aýyl sharýashylyǵynyń jalpy ónimi kóleminiń ortasha jyldyq ósýi 3,9%-dy quraıdy», -dedi vedomstvo basshysy.

Mınıstrliktiń boljamyna súıensek, qurylys salasynyń boljamdy ósýi orta eseppen 3,8%-dy, saýda – 5,7%-dy quraýǵa tıis.

«Munaı óndirý 2023 jyly 92,6 mln tonnany qurap, 2027 jyly 99,9 mln tonnaǵa deıin ulǵaıady.

Ulttyq Banktiń boljamy boıynsha eksport 80,9 mlrd dollarynan 84,6 mlrd dollaryna deıin, ımport 45,7 mlrd dollarynan 53,5 mlrd dollaryna deıin ósedi», - dedi mınıstr.