2027 jyldan mektepke deıingi tárbıe uıymdaryn lıtsenzııalaý tártibi engiziledi

<p>ASTANA. KAZINFORM &mdash; Búgin Senattyń jalpy otyrysynda &laquo;Qazaqstan Respýblıkasynyń keıbir zańnamalyq aktilerine memlekettik nagradalar, bilim berý jáne balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly&raquo; Zańy eki oqylymda qaralyp, maquldandy.</p>

Zańdy qabyldaýdyń maqsaty - Qazaqstan Respýblıkasynyń mektepke deıingi, orta, tehnıkalyq ári kásiptik, orta bilimnen keıingi bilim berý, qosymsha bilim berý jáne balalardyń quqyqtaryn qorǵaý salasyndaǵy zańnamasyn jetildirý, sondaı-aq quqyqtyq olqylyqtar men qaıshylyqtardy joıý.

Senattyń Áleýmettik-mádenı damý jáne ǵylym komıtetiniń málimetine qaraǵanda, zańmen «Neke jáne otbasy týraly» Kodeksine, Azamattyq protsestik kodeksine, sondaı-aq Qazaqstan Respýblıkasynyń 7 Zańyna ózgerister men tolyqtyrýlar engiziledi.

Zańmen «Neke jáne otbasy týraly» Kodeksine balany qabyldaıtyn kásibı otbasy túrindegi otbasylyq ornalastyrýdyń jańa nysany engiziledi, balany qabyldaıtyn kásibı otbasy qyzmetiniń quqyqtyq negizi, osy saladaǵy quqyqtyq qatynastar sýbektileriniń quqyqtary men mindetteri, sondaı-aq balany qabyldaıtyn kásibı otbasynyń qorǵanshylyq nemese qamqorshylyq salasyndaǵy ýákiletti organdarmen ózara is-qımyl jasaý tetikteri aıqyndalady. Sondaı-aq kámeletke tolmaǵandarǵa qatysty qorǵanshylyq nemese qamqorshylyq jónindegi fýnktsııalardy júzege asyratyn organ mamandarynyń shtat sanynyń normatıvi aýdandaǵy, oblystyq mańyzy bar qaladaǵy, respýblıkalyq mańyzy bar qaladaǵy, astanadaǵy balalar sany negizge alyna otyryp, bes myń balaǵa keminde bir maman araqatynasynda aıqyndalatyn norma engiziledi.

Zań aıasynda memlekettik nagradalar júıesine kólik, qurylys, geologııalyq-barlaý, metallýrgııa, taý-ken óndirý, agrarlyq, sý jáne ekonomıkanyń ózge de salalarynyń mamandary, sondaı-aq ǵalymdar men ónertapqyshtar úshin qurmetti ataqtardy engizýge baǵyttalǵan birqatar túzetý eskerilgen.

- Zańmen Ruqsattar jáne habarlamalar týraly zańnamaǵa sáıkes qosymsha bilim berý uıymdary úshin qyzmettiń bastalǵany nemese toqtatylǵany týraly habarlama jasaý tártibi, onlaın-oqytý túri jáne tehnıkalyq jáne kásiptik oqytý uıymdaryndaǵy akademııalyq utqyrlyq qaǵıdaty, sondaı-aq menshik nysanyna qaramastan mektepterde áleýmettik turǵydan osal otbasylardan shyqqan balalarǵa áleýmettik kómek kórsetý tetikteri belgilenedi, - delingen Senat komıtetigiń aqparatynda.

Budan basqa, zań aıasynda 2027 jylǵy 1 qańtardan bastap mektepke deıingi tárbıe berý men oqytý salasynda qyzmet kórsetetin uıymdardy lıtsenzııalaý tártibi engiziledi.

Bıyl qarasha aıynda balany qabyldaıtyn kásibı otbasylar ınstıtýty jumysyn bastaıtyny málim boldy.

Osyǵan deıin kolledjderde onlaın oqytý men akademııalyq utqyrlyq engiziletini týraly jazdyq.