2026 jylǵa qaraı SQO aýyl sharýashylyǵynda 141 mlrd teńgege 72 joba júzege asyrylmaq

PETROPAVL. QazAqparat – Premer-Mınıstrdiń orynbasary Altaı Kólginov Soltústik Qazaqstan oblysyna jumys sapary aıasynda birqatar áleýmettik nysannyń qurylysymen jáne «Aýyl Amanaty», «Aýyldyq densaýlyq saqtaýdy jańǵyrtý», ​​«Jaıly mektep» ulttyq jobalarynyń iske asý barysymen tanysty. Bul týraly QazAqparat Úkimettiń resmı saıtyna silteme jasap habarlaıdy.

Vıtse-premer shaǵyn nesıeleý baǵdarlamasyna qatysýshylarmen kezdesti. Óńirde azamattardyń óz isin ashý jáne damytý boıynsha kásipkerlik bastamalaryn qoldaý jumystary júrgizilip jatyr. Sońǵy 3 jylda bul maqsatqa 5 mlrd teńgeden astam qarjy bólindi. Bıznes ashý boıynsha 1 000 ótinimge qoldaý kórsetildi. Bıyl jastardyń óz isin ashýyna 650 mln teńgege 130 shaǵyn nesıe berildi.

Petropavlda Altaı Kólginov «Jas Órken» shaǵyn aýdanyndaǵy bıyl paıdalanýǵa beriletin jańa emhananyń qurylysymen tanysty. «Bereke» shaǵyn aýdanynda taǵy bir emhana salynyp jatyr. Sondaı-aq, «Aýyldyq densaýlyq saqtaýdy jańǵyrtý» ulttyq jobasy aıasynda Soltústik Qazaqstan oblysynyń aýdandarynda 46 medıtsınalyq nysannyń qurylysy bastalady. Bul – FAP, dárigerlik ambýlatorııa jáne medıtsınalyq pýnktiler. Kishkenekól aýylynda da jańa emhananyń qurylysy josparlanyp otyr.

Jalpy, elimizdiń aımaqtary men shalǵaı aýyldarda 2023-2025 jyldar aralyǵynda alǵashqy medıtsınalyq-sanıtarlyq kómek kórsetýge arnalǵan 650-den astam medıtsınalyq nysan salynyp, 30-dan astam emdeý mekemesine kúrdeli jóndeý jáne jańǵyrtý jumystary júrgiziledi.

Jumys sapary barysynda Altaı Kólginov 68 zamanaýı zerthanamen jabdyqtalǵan M. Qozybaev atyndaǵy SQÝ-dyń jańa oqý-zerthanalyq korpýsyna bardy. Ótken jyly Arızona ýnıversıtetimen birigip, qos dıplomdy oqý baǵdarlamasy iske qosylǵan. Halyqaralyq baǵdarlama boıynsha ár qaladan 155 stýdent bilim alyp jatyr. Stýdentter úshin 1 700 oryndyq jańa jataqhana qurylysy bastalǵan. Sonymen qatar, «Jaıly mektep» ulttyq jobasy aıasynda Petropavlda 4 mektep salynady.

Sonymen qatar, Premer-Mınıstrdiń orynbasary Altaı Kólginov Qyzyljar aýdany Chapaevo aýylyndaǵy «Qyzyljar sút» fermasyna da bardy. Soltústik Qazaqstan oblysy ákimdiginiń aqparaty boıynsha, sońǵy jyldary óńirde zamanaýı 30 sút kesheni salynǵan. 2022 jyly 10,5 myńnan astam jańa turaqty jumys orny ashyldy. Jalpy, 2026 jylǵa qaraı Soltústik Qazaqstan oblysynyń aýyl sharýashylyǵynda 141 mlrd teńgege 72 joba júzege asyrylmaq. Bul – sút fermalarynyń, qus etin shyǵarytyn fabrıkalardyń, maıdy ekstraktsııalaý zaýytynyń jáne jylyjaı keshenderiniń qurylysy. Taǵy 4 myńnan astam jańa turaqty jumys ornyn ashý josparlanyp otyr.