2025 jyly memlekettiń ekonomıkadaǵy úlesi 14 paıyzǵa azaıtylady - UEM

NUR-SULTAN. QazAqparat – 2025 jylǵa qaraı memlekettiń ekonomıkadaǵy úlesi 14 paıyzǵa deıin azaıtylady. Bul týraly Ortalyq kommýnıkatsııalar qyzmetindegi baspasóz máslıhatynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

Mınıstrdiń atap ótýinshe, Kásipkerlikti damytý jónindegi ulttyq jobanyń «Básekelestikti keshendi damytý» baǵyty aıasynda taýar bırjalaryn damytý, ekonomıkany odan ári memleket ıeliginen alý jáne salaýatty básekelestik ortany qamtamasyz etý is-sharalary kózdelgen .

«Nátıjesinde suıytylǵan munaı gazyn taýar bırjalary arqyly ótkizý úlesi 80-nen 100 paıyzǵa deıin ulǵaıtylady. 2025 jylǵa qaraı memlekettiń ekonomıkadaǵy úlesi 14 paıyzǵa deıin azaıtylady. Memlekettik tapsyrmalar sany 157-den 70 birlikke deıin qysqartylady. Sonymen qatar 20 operatordy taratý jáne qaıta uıymdastyrý qarastyrylǵan. Biryńǵaı operatorlar sany 1,6 esege qysqarady», - dedi Áset Erǵalıev.