2025 jylǵy EKSPO-ny ótkizýge kandıdat Japonııa Qazaqstannan qoldaý surady
Senat tóraǵasy Memleket basshysynyń 2016 jylǵy Japonııaǵa sapary barysynda qabyldanǵan «keńeıtilgen strategııalyq áriptestik» mártebesin bekitken saıası qujattar, jańa geosaıası ahýalda ekijaqty qarym-qatynastarǵa tyń serpin beretindigine senim bildirdi.
Parlamentaralyq dıalogty nyǵaıtý keleshegin talqylaı kelip, Q.Toqaev Qazaqstanmen dostyq jónindegi japon lıgasynyń eki el arasyndaǵy yntymaqtastyqty tereńdetýge aýqymdy úles qosyp otyrǵan qyzmetin joǵary baǵalady.
«EKSPO-2017» aıasynda Astanaǵa kelgen jetekshi elderdiń jańartylǵan energetıka salasyndaǵy jobalary men aldyńǵy qatarly tehnologııalary kórsetilgen halyqaralyq kórmeniń joǵary uıymdastyrýshylyq jáne mazmundyq deńgeıin atap ótti. «EKSPO ótkizý - tarıhı oqıǵa bolyp tabylady, onyń Qazaqstannyń damýyna úlken paıdasy tıetinine senimdimin», - dedi japondyq depýtat.
T. Kavamýra Q.Toqaevqa 2025 jyly EKSPO halyqaralyq kórmesin ótkizýge Japonııa óz kandıdatýrasyn usynǵanyn aıtty jáne bul máselede Qazaqstannan qoldaý surady.
Taraptar sondaı-aq qarýsyzdaný jáne ıadrolyq qarýdy taratpaý salasyndaǵy yntymaqtastyq máselesin jan-jaqty talqylady. Senat tóraǵasy: «Qazaqstan úshin bul asa mańyzdy másele, Nursultan Nazarbaevty jahandyq antııadrolyq qozǵalystyń kóshbasshysy dep ataıtyny sondyqtan», - dep atap ótti. Q.Toqaev aǵymdaǵy jyly tamyz aıynda Astanada ǵalymdardyń Pagýosh konferentsııasy ótetini, bizdiń elordamyz 2015 jyly osyndaı forýmdy ótkizgen Nagasakı qalasynan estafetany alyp jalǵastyratyny týraly japondyq depýtatty habardar etti.