2025 jylǵa qaraı JІÓ-degi týrızm salasynyń úlesi 8 paıyzdy quramaq

NUR-SULTAN. QazAqparat – 2025 jylǵa qaraı jalpyishki ónimdegi týrızm salasynyń úlesi keminde 8 paıyzdy quraıtyn bolady. Bul týraly Ortalyq kommýnıkatsııalar qyzmetindegi baspas máslıhatynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

Mınıstrdiń atap ótýinshe, Kásipkerlikti damytý jónindegi ulttyq jobanyń «Jańa taýashalardy qalyptastyrý» baǵyty aıasynda týrızmdi damytý úshin qolaıly jaǵdaılar jasaý kózdeledi.

«Eldiń týrıstik áleýetin ashý maqsatynda bir myńǵa jýyq ınvestıtsııalyq joba iske asyrylyp, jol boıyndaǵy servıs jelisin damytý qamtamasyz etiledi. Nátıjesinde 2025 jylǵa qaraı JІÓ-degi týrızm salasynyń úlesi keminde 8 paıyzdy qurap, ishki týrıstik aǵyn 5,3-ten 8 mln adamǵa deıin ulǵaıady. Al týrızm salasyndaǵy ınvestıtsııalar kólemi 6,9 trln teńgeni quraıdy», - dedi ol.

Onyń aıtýynsha, týrızm salasyn damytýǵa zamanaýı tehnologııalardy engizý úshin týrıstik qyzmet kórsetý salasy men sapasyn basqarý júıesin jetildirý maqsatynda is-sharalar kózdelgen.

«Bul ornalastyrý oryndarynyń 95 paıyzyn E-QONAQ aqparattyq júıesimen qamtýǵa múmkindik beredi»,- dedi Áset Erǵalıev.