2025 jylǵa qaraı múgedekter ońaltý quraldarymen 100% qamtylady – Úkimet
«Tuńǵysh Prezıdent qorynyń bastamasymen salynyp jatqan 8 balalardy ońaltý ortalyǵyn bıylǵy jyl sońyna deıin ashý josparlanǵan. 3 ortalyqty memlekettik-jekeshelik áriptestik aıasynda ashý boıynsha jumys júrgizilip jatyr. Bul múgedekterdi medıtsınalyq ońaltýmen qamtý úlesin bıyl 60% deıin, kelesi jyly 75% deıin arttyrýǵa múmkindik beredi. Jalpy, múmkindikteri shekteýli adamdardy qoldaý boıynsha sharalar keshenin iske asyrýdy jalǵastyrýymyz kerek», - dedi Premer-Mınıstr.
A. Mamın Eńbek jáne áleýmettik qorǵaý mınıstrligine kelesi jyly muqtaj adamdardy tehnıkalyq ońaltý quraldarymen qamtýdy 80 paıyzǵa jáne 2025 jyly 100 paıyzǵa deıin ulǵaıtýdy tapsyrdy.
«Ekinshi, 2021 jyldan bastap Áleýmettik qyzmetter portaly tolyq iske qosylatyn bolady. Osy rette, ákimdikter múgedektigi bar adamdardy Portal arqyly ońaltý quraldaryn alý daǵdylaryna belsendi túrde oqytýy qajet.
Tsıfrlyq damý mınıstrligimen birlesip, Jumyspen qamtý ortalyqtary men Halyqqa qyzmet kórsetý ortalyqtarynda múgedektigi bar adamdar úshin ózine-ózi qyzmet kórsetý alańdaryn kóbeıtsin. Úshinshi, Densaýlyq saqtaý mınıstrligi ákimdiktermen birlesip, múgedektiktiń aldyn alý úshin syrqattarǵa dıagnostıkany erte júrgizýge kóńil bólip, múgedektigi bar adamdarǵa ońaltý kómegin kúsheıtsin, salynyp jatqan barlyq ońaltý ortalyqtaryn ýaqytyly paıdalanýǵa berýdi qamtamasyz etsin», - deıdi A. Mamın.
Tórtinshiden, Bilim mınıstrligi ákimdiktermen birlesip, kelesi jyly balalardy ınklıýzıvti bilim berýmen qamtýdy 50 paıyzǵa deıin keńeıtýi kerek. Bilim berý baǵdarlamalarynyń mazmunyn jáne pedagogtardy daıarlaýdy ınklıýzıvti bilim berýdiń engizilýin eskerip jańartý qajet.
Túzeý kabınetteri jelisi men psıhologııalyq-medıtsınalyq jáne pedagogıkalyq komıssııalardyń qyzmetin keńeıtý sharalary qabyldanýy qajet.
«Besinshi, Indýstrııa mınıstrligi memlekettik organdarmen jáne ákimdiktermen birlesip, múgedektigi bar adamdar úshin kedergisiz orta jasaý jumysyn jalǵastyrsyn jáne obektilerdiń ásirese, kólikte qoljetimdiligin baqylaýdy kúsheıtsin. Múmkindigi shekteýli adamdarǵa qyzmet kórsetý talaptaryna sáıkes vokzaldardy jańartýdy aıaqtaý qajet. Qoǵamdyq avtobýs parkterin belgilengen talaptarǵa sáıkes keltirý boıynsha túbegeıli sharalar qabyldaý qajet, bul ásirese jumys qarqyny baıaý óńirlerge qatysty. Jyl aıaǵyna deıin múmkindigi shekteýli adamdarǵa kedergisiz ortany 100 paıyz qamtamasyz etý boıynsha Jol kartasyn ázirlesin», - dep tapsyrma berdi Asqar Mamın.