2025 jylǵa qaraı memlekettiń ekonomıkaǵa qatysýy EYDU elderi deńgeıine deıin qysqartylady - M. Qusaıynov

ASTANA. QazAqparat - Úkimettiń róli bıznes pen kásipkerler úshin jemisti ári qolaıly ortany qurýmen shekteledi. Bul týraly búgin Nazarbaev Ýnıversıtetinde Qazaqstan men EYDU yntymaqtastyǵy boıynsha Eldik baǵdarlama jobasy nátıjelerin tanystyrý kezinde QR Ulttyq ekonomıka birinshi vıtse-mınıstri Marat Qusaıynov málim etti.

«Bizdiń basty maqsat 2025 jylǵa qaraı memlekettiń ekonomıkaǵa qatysýyn Ekonomıkalyq yntymaqtastyq jáne damý uıymy elderi deńgeıine deıin qysqartýǵa negizdelgen. Úkimettiń róli bıznes pen kásipkerler úshin jemisti ári qolaıly ortany qurýmen shekteledi. Osy arqyly biz EYDU-nyń úzdik tájirıbesine sáıkes, aqshalaı-nesıelik jáne fıskaldy saıasatty júrgizýdiń berik ustanymdaryn qurý úshin tıisti sharalardy qabyldaýdamyz»,-dedi M. Qusaıynov.

Osy rette ol bıznestiń rólin kúsheıtý men kásipkerler múddesin qorǵaý úshin bıznes-ombýdsmenniń ınstıtýty jaqsaratynyn jetkizdi.

Sonymen qatar birinshi vıtse-mınıstr Qazaqstannyń ınvestıtsııalyq tartymdylyǵyn arttyrý boıynsha Astana Halyqaralyq qarjy ortalyǵynyń negizi qalanǵanyn eske salyp ótti.

«Biz jańa ınfraqurylymdy qurý baǵytynda jumys isteýdemiz, onyń ishinde joǵary tehnologııalyq aqparattyq tehnologııalardy engizý eskerilýde, sondaı-aq olardyń jerdegi, áýedegi jáne teńizdegi kólik pen kommýnıkatsııa aǵymyna ıntegratsııasy qamtylýda»,-dedi ol.