2025 jylǵa qaraı Quryq portynda «Sarja» teńiz termınaly salynady

ASTANA. QazAqparat – 2025 jylǵa qaraı Qazaqstan porttarynyń júk ótkizý qabileti 30 mln tonnaǵa jetedi. Bul týraly Kólik komıteti tóraǵasynyń orynbasary Qasym Tilepov málim etti, dep habarlaıdy QazAqparat tilshisi.

«Aqtaý teńiz porty men Quryq porty parom kesheni halyqaralyq kólik dálizderi jelisine qosylǵan. Qazaqstandyq logıstıkalyq toraptyń qýaty jylyna 21,2 mln tonna júk ótkizýge qaýqarly. Bizdiń porttar Soltústik-Ońtústik, TRASEKA sııaqty halyqaralyq kólik dálizderimen qıylysady. Transkaspıı baǵyty boıynsha júk aǵyny men konteınerlik tasymaldardy ulǵaıtý úshin 2025 jylǵa qaraı Aqtaý portynda konteınerlik hab qurýdy josparlap otyrmyz», - dedi ol «Kazakhstan Global Investment Roundtable-2022» atty jahandyq ınvestıtsııalar jónindegi dóńgelek ústeldiń jalpy otyrysynda.

Aıtýynsha, atalǵan joba tasymaldaý kólemin jylyna 40 myńnan 215 myń dana jıyrma fýttyq konteınerge deıin ulǵaıtady.

«Maersk, Cosco shipping, CMA CGM sııaqty halyqaralyq konteınerlik operatorlardy tartý josparlanyp otyr. Qazaqstannyń port ınfraqurylymyn damytý úshin Quryq portynda 2025 jylǵa qaraı «Sarja» teńiz termınalynyń qurylysy júrgizilmek. Joba aıasynda kólik-logıstıkalyq ortalyq pen astyq jáne suıyq júkter termınaly salynady. Bul Qazaqstan porttarynyń ótkizý qabiletin 30 mln tonnaǵa jetkizýge múmkindik beredi», - dedi Qasym Tilepov.