2025 jylǵa qaraı Qazaqstanda jańartylatyn energetıka 6 paıyzǵa jetedi
«Elektr energetıkasyndaǵy jańa tehnologııalar energııa júıesin basqarýdyń, naryqqa qatysýshylardyń ózara qarym-qatynasynyń jańa qaǵıdattaryn, sondaı-aq uzaq merzimge egjeı-tegjeıli josparlaýdy qajet etedi. Elimizde jańartylatyn energetıkany damytý sońǵy onjyldyqta elektr energetıkasy salasyndaǵy tásilderdi qaıta qaraýdy talap etip otyr. Memlekettik josparlaý júıesiniń qujattarynda mynadaı naqty maqsattar qoıylǵan, atap aıtqanda elektr energııasyn óndirýdiń jalpy kólemindegi jańartylatyn energetıkanyń úlesin 2025 jyly 6 paıyzǵa, 2030 jyly 10 paıyzǵa deıin jetkizý eskerilgen. Al 2050 jylǵa qaraı jalpy energııa tutynýdyń keminde jartysy jańartylatyn jáne balamaly energııa kózderine tıesili bolýǵa tıis», - dedi mınıstr.
Onyń aıtýynsha, Qazaqstannyń «jasyl» ekonomıkaǵa kóshý tujyrymdamasynda 2020 jyl jańartylatyn energetıka ındıkatoryn oryndaýdyń mejelik kezeńi boldy. 2020 jyldyń qorytyndysy boıynsha elektr energııasyn óndirýdiń jalpy kólemindegi jańartylatyn energetıkanyń úsh paıyzdyq úlesi tolyq oryndaldy.
«Jańartylatyn energetıka salasynyń qalyptasý kezeńinde Úkimet barlyq qajetti jaǵdaılardy jasady. Úzdik halyqaralyq tájirıbeni eskere otyryp, 2013 jyly tirkelgen tarıfter júıesi engizilip, jańartylatyn energııa kózderi elektr energııasyn biryńǵaı satyp alýshy quryldy. Elektrondyq aýktsıonǵa kóshý júzege asyryldy. Tirkelgen tarıfter tetigi jańartylatyn energetıka damýynyń bastapqy kezeńinde osy sala naryǵyn jyldam iske qosyp, jel, kún energetıkasynyń birqatar jobalaryn júzege asyrýǵa múmkindik berdi», - dedi N. Noǵaev.
Onyń sózine qaraǵanda, salanyń damýyna kórsetilgen qoldaýlardyń nátıjesinde jańartylatyn energııa kólemi turaqty ósip keledi. Sońǵy 6 jylda jańartylatyn energetıka nysandarynyń belgilengen qýaty shamamen 10 esege ulǵaıyp, 2014 jylǵy 178 MVt-tan 2020 jyly 1635 MVt-ty qurady.