2025 jylǵa deıingi ulttyq damý jospary ózektiligin joǵaltty – Prezıdent

ASTANA. QazAqparat – Jańa ulttyq damý josparyn ázirleý qajet. Bul týraly elimizdiń áleýmettik-ekonomıkalyq damýy jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Qazir memlekettik josparlaý júıesinde 163 qujat bar. Onyń árqaısysy ortasha alǵanda 40 is-sharany qamtıdy. 2010 jyldan beri sozylyp kele jatqan tapsyrmalar bar. Tapsyrmalardyń ózektiligin qaıtadan muqııat qaraý qajet. Qaǵazbastylyq kerek emes. Men sońǵy kezdegi jahandyq úrdisterdi eskerip, 2050-Strategııasyn jańartýdy tapsyrdym. Bul uzaq merzimge arnalǵan qujat bolýǵa tıis. Onda áleýmettik-ekonomıkalyq jáne qoǵamdyq-saıası damý jolyndaǵy negizgi basymdyqtar aıqyndalýy kerek», - dedi Qasym-Jomart Toqaev.

Prezıdent 2025 jylǵa deıingi ulttyq damý jospary ózektiligin joǵaltty dep oılaıtyndyǵyn basa aıtty.

«Sol sebepti jańa qujat ázirleý qajet. Onda elimizdiń orta merzimge arnalǵan maqsat-mindetteri naqty belgilenýge tıis. Bul qujat memleketimizdi damytýǵa qatysty barlyq máseleni qamtýy qajet. Saılaý aldyndaǵy baǵdarlamam da eskerilýi kerek. Oǵan Májilis saılaýynda jeńiske jetken «Amanat» partııasy baǵdarlamasynyń negizgi tustaryn qosqan jón. Basqa partııalardyń oryndy usynystaryna da basa mán bergen abzal», - dedi Memleket basshysy.