2025 jylǵa deıin orta arnaýly kásiptik bilim berý tegin bolady - Toǵjanov

NUR-SULTAN. QazAqparat - Búgin QR Premer-Mınıstriniń orynbasary Eraly Toǵjanov QR Prezıdenti janyndaǵy jastar saıasaty jónindegi keńestiń, Prezıdenttik jastar kadrlyq rezerviniń múshelerimen, jastar uıymdarynyń ókilderimen, jas kásipkerlermen, jas ǵalymdarmen jáne belsendilermen Astana hub aýmaǵynda kezdesý ótkizdi.

QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııasynyń habarlaýynsha, shara barysynda qatysýshylar jastar saıasatyn iske asyrý men olardy qoldaý jónindegi memlekettik sharalar, sondaı-aq Qazaqstan Respýblıkasynyń Konstıtýtsııasyna engizilýi josparlanǵan túzetýler boıynsha aldaǵy referendýmnyń mindetterin talqylady.

E.Toǵjanov jastardy qoldaý baǵytynda Úkimet birqatar aýqymdy jumys júrgizip jatqanyn atap ótti. Máselen, 2025 jylǵa deıin orta arnaýly kásiptik bilim berýdi aqysyz etý josparlanyp otyr. Ondaǵan myń grant bólinetin úzdik halyqaralyq ýnıversıtetter elimizde óz fılıaldaryn ashýda. Sondaı-aq, jas ǵalymdarǵa da qoldaý kórsetiledi. Úkimet jas ǵalymdardyń sanyn 50% - ǵa deıin arttyrý mindetin qoıdy.

QR Premer-Mınıstriniń orynbasary jumyspen qamtý máseleleriniń oń sheshimin taýyp jatqanyn atap ótti. Kommertsııalyq ıdeıalarǵa 10 myń grant bólinýde, olardyń somasy 1,2 mıllıon teńgege deıin ulǵaıdy. 2025 jylǵa deıin 2 mln. qazaqstandyq úshin jańa jumys oryndaryn ashý josparlanǵan.

«Jastardyń negizgi problemalarynyń biri - turǵyn úımen qamtamasyz etý. Biz 2025 jylǵa qaraı turǵyn úı qurylysynyń barlyq baǵdarlamalary sheńberinde jas otbasylar úshin 25% kvota engizýdi kózdep otyrmyz. Búgingi kúni 3 óńirde iske asyrylyp jatqan Otbasy bankiniń jeńildetilgen ıpoteka baǵdarlamasyn barlyq óńirde iske qosý josparlanyp otyr», - dedi E.Toǵjanov.

Sondaı-aq Eraly Toǵjanov Memleket basshysymen alǵa qoıylǵan mindetter týraly aıtty.

Bıylǵy 16 naýryzda Prezıdent Qasym-Jomart Toqaev Qazaqstan halqyna «Jańa Qazaqstan: Jańarý men jańǵyrý joly» atty Joldaýyn arnady. Joldaý aıasynda saıası reformalardyń jalpy Qazaqstannyń júıeli transformatsııasyna yqpal etetin jáne memlekettiń uzaq merzimdi damýynyń jańa paradıgmasyn aıqyndaıtyn 10 basym baǵyty belgilendi.

«Qoǵam men eldiń ómirine jan-jaqty áser etetin saıası júıeni qaıta iske qosýdyń órshil maqsattary aıqyndaldy»- dep atap ótti vıtse-premer.

Talqylaý barysynda qatysýshylar ózderin qyzyqtyrǵan suraqtaryn qoıyp, ózekti máseleler boıynsha pikir almasty, sondaı-aq jastar saıasatyn jetildirý boıynsha usynystaryn da jetkizdi.

Kezdesý qorytyndysy boıynsha Eraly Toǵjanov qatysýshylardy aldaǵy referendýmǵa belsendi qatysýǵa shaqyrdy. Jastar vıtse-premerdiń úndeýin biraýyzdan qoldady.