2025 jylǵa deıin ǵalymdar sany 1,5 ese kóbeımek

NUR-SULTAN. QazAqparat – 2025 jylǵa deıin ǵalymdar sanyn 1,5 ese arttyrý mindeti tur. Bul týraly Úkimet otyrysynda tehnologııalyq serpilis ulttyq jobasyn talqylaý kezinde QR Ǵylym jáne joǵary bilim mınıstri Saıasat Nurbek aıtty, dep habarlaıdy QazAqparat.

«Ulttyq joba boıynsha ǵylymnyń kadrlyq áleýetin nyǵaıtý úshin 2025 jylǵa deıin ǵalymdar sanyn 1,5 ese arttyrý mindetin qoıyp otyrmyz, ıaǵnı ǵalymdar men jas ǵalymdar sanynyń 50 paıyzǵa ósýi josparlanǵan. Búgingi tańda ǵalymdar men zertteýshilerdiń sany 21,6 myń adamdy quraıdy (2020 j. – 22 665, 2019 j. – 21 843). Onyń 7 525-i jas ǵalym bolsa, bul jalpy ǵalymdardyń 35 paıyzyn qurap otyr», - dedi S. Nurbek.

Onyń aıtýynsha, ǵalymdardyń jalaqysy 2 ese ósti (252 myń teńgege deıin). Іrgeli zertteýlermen aınalysatyn ǴZI-dy tikeleı qarjylandyrý engizildi.

«Jas ǵalymdardy qoldaý jáne yntalandyrý úshin «Jas ǵalym» jobasy aıasynda jas ǵalymdarǵa ǵylymı zertteýlerge ári postdoktorantýra úshin 1037 grant bólindi. Jyl saıyn halyqaralyq taǵylymdamalarǵa 500 grant bólinedi. 2021 jyly álemdik ǵylymı ortalyqtarǵa 400 ǵalym jiberildi. 2020 jyldan bastap jyl saıyn 50 «Úzdik ǵylymı qyzmetker» syılyǵy tapsyrylady», - dedi mınıstr.

Onyń sózine qaraǵanda, elimizdiń 10 joǵary oqý ornynda postdoktorantýra qurylyp, dıssertatsııalyq keńesterge ǴZI men basqa da joǵary oqý oryndarynyń ǵalymdary tartylyp jatyr. Stýdentter men magıstranttardyń ǵylymı-zertteý qyzmetin yntalandyrý úshin stýdentter men magıstranttardyń ǵylymı qaýymdastyǵy quryldy.