2025 jyly járdemaqylar men zeınetaqy neshe paıyzǵa ósedi

<p>ASTANA. KAZINFORM &ndash; QR Eńbek jáne halyqty áleýmettik qorǵaý mınıstrligi keler jyly elimizde járdemaqy men tólemderdiń ósimine qatysty túsinik berdi.</p>

Qazaqstan Respýblıkasynyń Áleýmettik kodeksine sáıkes, respýblıkalyq bıýdjet esebinen kelesi járdemaqylar men tólemder qamtylǵan:

- bala týýyna baılanysty birjolǵy memlekettik járdemaqy;

- bala bir jarym jasqa tolǵanǵa deıin onyń kútimine baılanysty aı saıynǵy memlekettik járdemaqy;

- birge turatyn tórt jáne odan kóp kámeletke tolmaǵan balasy, onyń ishinde 18 jasqa tolǵannan keıin bilim berý uıymdaryn bitiretin ýaqytqa deıin (biraq jıyrma úsh jasqa tolǵanǵa deıin) jalpy orta, tehnıkalyq jáne kásiptik, orta bilimnen keıingi, joǵary nemese joǵary oqý ornynan keıingi bilim berý uıymdarynda jalpy bilim beretin, sondaı-aq kásiptik baǵdarlamalar boıynsha kúndizgi oqý nysany boıynsha bilim alatyn balalary bar kópbalaly otbasylarǵa beriletin aı saıynǵy memlekettik járdemaqy;

- «Altyn alqa», «Kúmis alqa» alǵan nemese buryn «Batyr ana» ataǵyn alǵan, І jáne ІІ dárejeli «Ana dańqy» ordenderimen marapattalǵan kópbalaly analarǵa beriletin aı saıynǵy memlekettik járdemaqy;

- múgedektigi bar balany tárbıelep otyrǵan anaǵa nemese ákege, bala asyrap alýshyǵa, qamqorshyǵa taǵaıyndalatyn jáne tólenetin memlekettik járdemaqy;

- azamattardyń jekelegen sanattaryna taǵaıyndalatyn arnaýly memlekettik járdemaqy;

- asyraýshysynan aıyrylý jaǵdaı boıynsha jáne múgedektigi bar adamdarǵa memlekettik járdemaqy;

- jerasty jáne ashyq ken jumystarynda, eńbek jaǵdaılary erekshe zııandy jáne erekshe aýyr jumystarda nemese eńbek jaǵdaılary zııandy ári aýyr jumystarda istegen adamdarǵa beriletin memlekettik arnaıy járdemaqy.

«Joǵaryda atalǵan járdemaqylar men tólemderdiń mólsheri eń tómengi kúnkóris deńgeıiniń shamasyna jáne aılyq eseptik kórsetkishke baılanysty belgilenedi. 2025 jyldyń basynan atalǵan járdemaqylardyń mólsheri 6,5 paıyzǵa artady. QR Prezıdentiniń 2014 jylǵy 18 maýsymdaǵy № 841 Jarlyǵymen bekitilgen Qazaqstan Respýblıkasynyń zeınetaqy júıesin 2030 jylǵa deıin odan ári jańǵyrtý tujyrymdamasyna sáıkes, yntymaqty zeınetaqy mólsherin qolaıly deńgeıde ustap turý úshin olardyń mólsheri jyl saıyn ınflıatsııa deńgeıinen eki paıyzǵa ozyp ındeksteledi. «2025-2027 jyldarǵa arnalǵan respýblıkalyq bıýdjet týraly» zań jobasyna sáıkes, jasyna jáne eńbek sińirgen jyldaryna baılanysty zeınetaqy tólemderiniń mólsherin 2025 jylǵy 1 qańtardan bastap alynatyn mólsherden 8,5%-ǵa arttyrý josparlanyp otyr, bazalyq zeınetaqy mólsheri eń tómengi kúnkóris deńgeıiniń ózgerýine baılanysty ósetin bolady. Biryńǵaı jınaqtaýshy zeınetaqy qorynan tólenetin zeınetaqy tólemderi jyl saıyn 5% -ǵa ındeksteledi», - delingen Eńbek mınıstrliginiń Kazinform agenttigine bergen jaýabynda.

Sonymen qatar, «Memlekettik áleýmettik saqtandyrý qory» AQ-dan tólenetin eńbekke qabilettilikten aıyrylý jáne asyraýshysynan aıyrylý jaǵdaılary boıynsha tólenetin áleýmettik tólemderdiń mólsheri 2025 jylǵy 1 qańtardan bastap 6,5%-ǵa artady.

Osyǵan deıin BAQ ókilderimen kezdesken Eńbek jáne halyqty áleýmettik qorǵaý mınıstri Svetlana Jaqypova el azamattarynyń zeınetkerlikke erte shyǵý múmkindigine qatysty pikir bildirdi.