2024 jyly Ulttyq onkologııalyq ortalyqta proton apparaty ornatylady

ASTANA. QazAqparat – Ulttyq onkologııalyq ortalyqtyń bazasynda protondy terapııa ortalyǵy 2024 jyly qoldanysqa beriledi. Bul týraly Densaýlyq saqtaý mınıstri Ajar Ǵınııat Úkimet otyrysynda málim etti, dep habarlaıdy QazAqparat tilshisi.

«Astanada onkologııalyq emdeýge arnalǵan ortalyqta Azııadaǵy tuńǵysh proton ortalyǵyn iske qosý jumystary qalaı júrip jatyr?» - dep surady Álıhan Smaıylov mınıstrden.

Vedomstvo basshysy protondy apparatqa arnalǵan býnker salynyp jatqanyn aıtty.

«Qazirgi tańda Ulttyq onkologııalyq ortalyqtyń qurylysy Astanada júrip jatyr. Onyń ishinde protondyq ortalyq qurylysy 2024 jyldyń aıaǵynda aıaqtalady. Qazir osy protondyq apparatty ornatatyn býnkerdiń qurylysy júrip jatyr. Sodan keıin apparatty ornatý, onyń qaýipsizdigin tekserý jumystary júredi. Osy apparat elimizde birinshi ret jumys isteıtin bolǵandyqtan, mamandardy oqytý jumystary júrgiziledi», - dedi Ajar Ǵınııat.

Mınıstr atalǵan mamandar buryn-sońdy elimizde bolmaǵanyn atap ótti.

«Byltyrdan bastap Germanııada, Nıderland elinde, Izraılde osy apparatpen jumys isteıtin mamandardy oqytyp jatyrmyz. Olar buryn bizdiń elimizde bolmaǵan – sáýlelik terapevter, medıtsına hımıkteri men fızıkteri. Bul jumys qazir birge júrip jatyr», - dedi ol.