2024 jyly shyǵatyn «Kókbóriler týraly ańyz» kartınasynyń bıýdjeti - 350 mln teńge
Mádenıet jáne sport mınıstrliginiń málimetinshe, m emleket ındýstrııa mamandaryna belsendi qoldaý kórsete bastady. Jyl sońyna deıin kishkentaı kórermenderge birneshe zamanaýı mýltfılmder usynylady.
«Qazaqstandyq anımatsııa renessansty bastan keshýde. Biz kreatıvti sheshimderdi usyna biletin, zamanaýı, qyzyqty ónim jasaıtyn talantty jastarǵa qoldaý kórsetemiz. Jýyrda biz jańa jobalarǵa serpin berip, jas mýltıplıkatorlardyń biliktiligin arttyrý maqsatynda«Qazaqanımatsııa» shyǵarmashylyq birlestigin qurdyq. Biz birneshe baıqaý jarııaladyq, qazirdiń ózinde tyrnaqaldy nátıjelerdi kórip otyrmyz. Bizdiń basty talabymyz - balalar úshin sapaly, qyzyqty, laıyqty mýltfılmderdi shyǵarý», - dep atap ótti Dáýren Abaev.
Mınıstr halyqaralyq prokatqa shyǵatyn«Ashına. Kókbóriler týraly ańyz» tolyqmetrajdy mýltfılmin jasaý jumystarymen tanysty. Onyń shyǵýy 2024 jyldyń basyna josparlanǵan, anımatsııalyq fılmniń jalpy bıýdjeti 350 mıllıon teńgeni quraıdy.
«Bir ǵana anımatsııalyq fılmdi jaryqqa shyǵarý úshin 50-ge jýyq maman eńbek etip jatyr. Bul kartına birneshe kezeńnen turatyn úlken eńbekti, ýaqytty qajet etedi. Árıne, eń aldymen, sarapshy, tarıhshylarmen kóptegen kezdesýler ótkizip, stsenarıı jazdyq. Keıin keıipkerlerdiń sýretin salyp, 3D modeldeý, tekstýralyq 3D formatynda jumys istedik. Sýretshilerdiń eńbeginen keıin anımatorlar men vızýalızatorlar vızýaldy effektilerdi qosyp jatyr. Biz ishinara montajdaý jumystaryna kirisip kettik, jumys qarqyndy júrýde. Jobanyń basy-qasynda T. Júrgenov atyndaǵy Qazaq ulttyq óner akademııasynyń túlekteri júr, osy mýltfılmdi jasap jatqan da solar, muny qýana atap ótkim keledi», - dedi stýdııa dırektory Dilshat Rahmatýllın.
Foto: gov.kz