2024 jyly qańtarda 6,5 mln balanyń shotyna ulttyq qordan qarajat aýdaryla bastaıdy
Spıker «Balalarǵa arnalǵan ulttyq qordyń» qashan óz jumysyn bastaıtynyn málimdedi.
«Qazaqstanda qazirgi tańda 18 jasqa deıingi 6,5 mln-nan astam bala bar. Olardyń ózderiniń arnaıy shoty bolýy kerek. Biz bul máseleni qarastyryp jatyrmyz. Aldaǵy ýaqytta olardyń arnaıy shoty ashylady. Bul shotqa jyl saıyn qarajat túsip otyrýy kerek. Bala 18 jasqa tolǵanǵa deıin ol qarjyny alýyna mumkindik bolmaıdy. 18-ge tolǵanda bala ol qarjyny úıine nemese oqýyna jumsaýǵa múmkindik alady. Qazir biz «Balalarǵa arnalǵan ulttyq qordyń» kontseptsııasyn ázirleý ústindemiz. Tapsyrma boıynsha ol 2024 jyldyń 1 qańtarynda jumysyn bastaýy tıis», - dedi Erulan Jamaýbaev.
Ol jýrnalısterge «E-Salyq-Azamat» jáne «E-Salyq Business» mobıldi qosymshalary týraly aıtyp berdi.
«E-Salyq-Azamat» mobıldi qosymshasy azamattarǵa arnalǵan bolsa, «E-Salyq Business» qosymshasy jeke kásipkerlerge arnalǵan. Sizder osy eki qosymsha arqyly salyq mindettemesin oryndaı alasyz. Ol úshin jeke shotyńyzdy salyq tóleýshiniń jeke kabınetine qosýyńyz kerek. Onyń ishinde ótinishter, jazbasha ótinish, qońyraýlar bar. Siz osynyń bárin sonda jasaı alasyz jáne ol jyldam oryndalady. Eger sizde artyq tólem nemese qaryz boıynsha máseleler bolsa, ol jerden keńester ala alasyz», - dedi vıtse-mınıstr.
Ol sondaı-aq qandaı da bir bıznes ókilinde nemese azamatta aýdıtqa qatysty másele týyndasa, ol Qarjy mınıstrliginiń jergilikti melmekettik ishki aýdıt departamentine aryzdanýyna bolatynyn aıtty.
Sebebi, bul aryz arqyly jospardan tys tekserý júrgiziledi.
Erulan Jamaýbaev azamattardyń bankrottyǵy týraly zań jobasy ázirlengenin atap ótti.
«Qazir bul zań jobasy Parlament Májilisiniń qaraýyna usynyldy. Zań jobasynda qaryzyn, nesıesin óteı almaı júrgen azamattardyń jaǵdaıyn ońaltý máselesi qaralǵan. Biz qazir kóp azamattyń bankte nesıesi bar ekenin, olardy jaba almaı júrgenin, banktik emes qarjy uıymdarynyń aldynda qaryzy bar ekenin jaqsy bilemiz. Osyny eskere kele osyndaı zań jobasyn ázirledik», - dedi vıtse-mınıstr.
Onyń aıtýynsha Qarjy mınıstrliginde 15 myń adam jumys isteıdi.
«Olar kóbine tikeleı óziniń basshylaryn ǵana kóredi. Al vıtse-mınıstr men apparat basshysyn kúnde kóre bermeıdi. Ony jaqsy bilemiz, sebebi, bárimiz qyzmetti tómengi satydan bastaǵanbyz. Qazir bizdiń alǵa qoıǵan mindetimiz - Prezıdent tapsyrmasy boıynsha halyqqa qulaq asatyn memleket qurý jáne halyqpen ashyq túrde jumys isteý», - dedi ol.
Vıtse-mınıstr Almaty kásipkerleriniń ózekti máselelerine toqtaldy.
«Búgin biz qalany araladyq. Biraz nysandarǵa bardyq. Halyqpen kezdestik. Óte kóp suraqtar qoıyldy. Ásirese, kásipkerler «Salyq kodeksi, Satyp alý týraly zańǵa kóp ózgerister engizile bermese, osyǵan qatysty túsinikti júıeli bir saıasat bolsa» degen usynys aıtty, sondaı-aq, qala ishinde kásippen aınalysýǵa oryn tapshy ekenin, kópshiligi qala syrtynan bıznes ashqanyn aıtty. Osy oraıda aıta keteıin, men apta saıyn «Atameken» ulttyq kásipkerler palatasynyń ókilderimen jáne bıznes ókilderimen kezdesip otyramyn. Olardyń qandaı máseleleri bar ekenin apta saıyn talqylaımyz, olardy sheshý joldaryna kóńil aýdaryp kelemiz», - dedi ol.