2024 jyly TMD-da Volonterlik qozǵalys jylyn ótkizý jónindegi is-sharalar jospary qabyldandy

<p>Bishkek qalasyndaǵy &laquo;Ala-Archa&raquo; memlekettik rezıdentsııasynda Táýelsiz Memleketter Dostastyǵy elderiniń úkimet basshylary keńesiniń kezekti otyrysy ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Otyrys barysynda sóz alǵan Álıhan Smaıylov jahandyq syn-qaterlerge qaramastan, qatysýshy elder arasyndaǵy ózara saýdada oń serpin saqtalyp otyrǵanyn atap ótti. Bul kóbine Dostastyqtyń ıntegratsııalyq baılanystaryn damytýǵa negiz bolǵan Erkin saýda aımaǵy týraly shartty birlese iske asyrý nátıjesinde múmkin boldy.

«TMD elderi basshylarynyń qazan aıyndaǵy sammıtinde Qazaqstan Prezıdenti Qasym-Jomart Toqaev saýda-sattyqtaǵy kedergilerdi joıýǵa, qolaıly tarıftik jaǵdaılar jasaýǵa jáne ákimshilik rásimderdi jeńildetýge erekshe nazar aýdarý qajettigin atap ótti. Bul turǵyda Qyzmetterdiń erkin saýdasy týraly kelisimniń tezirek kúshine enýi mańyzdy bolyp otyr. Bul qujat aradaǵy ózara is-qımyldy jańa sapaly deńgeıge shyǵarýǵa múmkindik beredi», — dedi Premer-Mınıstr.

Sonymen birge, Úkimet basshysynyń pikirinshe, birlesken jumystyń negizgi maqsaty ónerkásiptik kooperatsııany keshendi túrde kúsheıtý bolýǵa tıis.

«Ónerkásiptik kooperatsııa tujyrymdamasyn jáne ony TMD-ǵa múshe memleketterde damytý jónindegi sharalar keshenin iske asyrý bizdiń elderimizdiń ekonomıkalaryna tyń serpin berip, belgilengen josparlardy tolyq kólemde júzege asyrýǵa yqpal etedi», — dedi Premer-Mınıstr.

Sondaı-aq Álıhan Smaıylov tranzıttik-kólik baǵyttaryn birlesip damytý serpindi jáne ózara tıimdi ekonomıkalyq yntymaqtastyqtyń kórsetkishi ekenin aıtty. Osyǵan baılanysty Transkaspıı halyqaralyq kólik baǵyty men «Soltústik-Ońtústik» dálizin damytýdyń mańyzy joǵary.

«Bul tranzıttik magıstraldardy jahandyq “Bir beldeý, bir jol” jobasymen toǵystyrýdyń mańyzdy zor. Qazaqstan óz tarapynan birlesken jumysqa daıyn», — dedi Álıhan Smaıylov.

Onyń aıtýynsha, ekonomıkalyq kún tártibin ilgeriletýmen qatar, mádenı-gýmanıtarlyq baılanystardy damytý da mańyzdy. Búginde bul baǵytta tıisti baǵdarlamalar men tujyrymdamalar qabyldanyp, TMD-nyń aýqymdy mádenı jobalary iske asyrylýda.

«Búgingi otyrysta biz 2024 jyly TMD-da Volonterlik qozǵalys jylyn ótkizý jónindegi is-sharalar josparyn qabyldaımyz. Osyndaı ıgi bastamalar TMD-nyń jaqsy ımıdjin qoldaýǵa, elder arasyndaǵy burynnan qalyptasqan dostyq baılanystardy nyǵaıtýǵa yqpal etetinine senimdimin», — dep túıindedi Premer-Mınıstr.

Іs-sharalarǵa Belarýs úkimet basshysy Roman Golovchenko, Qyrǵyzstan Mınıstrler kabınetiniń tóraǵasy Aqylbek Japarov, Reseı Premer-Mınıstri Mıhaıl Mıshýstın, Tájikstan úkimetiniń basshysy Kohır Rasýlzoda jáne Ózbekstannyń úkimet basshysy Abdýlla Arıpov, Ázerbaıjan Premer-Mınıstriniń orynbasary Shahın Abdýlla ogly Mýstafaev, Armenııa Vıtse-Premeri Mger Grıgorıan, Túrikmenstan Mınıstrler kabıneti tóraǵasynyń orynbasary Hodjamýrat Geldymýradov qatysty.

TMD elderi úkimet basshylarynyń keńesi otyrysynyń qorytyndysy boıynsha birqatar qujatqa qol qoıyldy, atap aıtqanda, olar geodezııa, kartografııa jáne geoaqparattyq tehnologııalar, taý-ken metallýrgııa salasy, IT-sektor jáne t.b. salalardaǵy yntymaqtastyqty nyǵaıtýǵa baǵyttalǵan.