2024 jylǵy Olımpıadanyń jabylý saltanaty: ataqty sportshylar men sarapshylar Jibek Joly arnasynda
Belgili sport kommentatory Aıbek Qabylshany qyzdar arasynda basketbol fınalyn júrgizip shyqqan boıda sózge tartqanbyz.
«Olımpıada bastalǵannan beri Jibek Joly arnasynda 20 kórsetilim júrgizdim. Bul arnanyń tehnıkalyq múmkindigi asa jaýapty efırlerdi esh alańsyz júrgizýge múmkindik berdi dep aıta alamyn. Onyń ústine kórsetilimge jaýapty ujym da kileń óz isin biletin kánigi mamandardan jasaqtalǵan. Ádette tikeleı efır kezinde qarbalas kóbeıip, júıkege salmaq túsip jatady. Biraq bul arnadaǵy 20 kórsetilimniń bári bir qarqynmen, eshbir aıqaı-súreńsiz, baıbalamsyz ótti. Adam jaqsyǵa tez úırenedi ǵoı. Jarty aıdaı ýaqyttyń ishinde osy arnadaǵy jyly qarym-qatynasqa tez-aq boı úıretip qalyppyz. Jalpy kez kelgen Olımpıada bitken sátte sport jýrnalısiniń kóńilinde bir qımastyq bolady. Búgin de sońǵy efırdi júrgizip otyryp, oıyndarǵa, ujymǵa degen qımastyq sezimdi sezindim», - deıdi áriptesimiz.
Kóp ótpeı stýdııaǵa Parıj Olımpıadasynda júldege qol sozym jerden qaıtqan dzıýdoshy Ábıba Ábýjaqynova keldi. Búgin ol da ıÝrıı Melnıchenko, Islam Baıramýkov sııaqty dańqty sportshylarmen birge Jibek Joly arnasynyń efırine shyǵyp, oıyndardyń jabylýyn Qazaqstan jurtymen birge tamashalaıdy.
«Halyqtyń qoldaýyn qatty sezinip jatyrmyn. Dzıýdony úzbeı kórip júrgender buǵan deıin halyqaralyq jarystarda quramanyń týyn jyqpaı, jalǵyz júldeger bolyp oralǵan sátterimdi eske salyp, barynsha demep jatyr. Osynyń bári sportshyǵa qosymsha qýat, bolashaqqa senim syılaıdy eken. Bir aıdan keıin bárin saraptap, aldaǵy jarystarǵa daıyndalsam dep otyrmyn. Olımpıada oıyndarynan keıin jyldam es jıyp, aldaǵy josparymdy pysyqtaýyma osy halyqtyń yqylasy kóp kómektesip jatyr», - deıdi sportshy.
Bul oıyndarda Qazaqstannyń medal qorjynyna «kúmis» salǵan sporttyń bir túri – grek-rım kúresi. Atlanta Olımpıadasynyń chempıony, grek-rım kúresinen ulttyq quramanyń bas bapkeri ıÝrıı Melnıchenko ózi jasaqtap aparǵan delegatsııanyń Parıj tórinde kórsetken nátıjesine kóńili tolǵanyn aıtady.
«Buǵan deıingi eki Olımpıadada grek-rım sheberleri júldeden tys qalyp júrgen. Tipti besinshi orynǵa kúresýdiń ózi armanǵa aınalǵandaı edi. Demeý Jadyraevtyń úsh birdeı beldesýinde álemdik reıtıngtiń basynda turǵan qarsylastaryn aıqyn jeńip, kúmis medal aldy. Onyń bul jeńisi kúreste júrgen jastarǵa úlken úmit, jiger beredi», - deıdi bapker.
Jalpy Jibek Joly arnasynyń ujymy úshin Olımpıadadan tikeleı kórsetilim taratý tarıhı kezeń deýge bolady. Bas rejısser Gúlsara Mýsına keıingi eki aptada kún saıyn 8-9 saǵattyq kórsetilimderdi úzilissiz júrgizgenderin aıtady.
«Eki apta boıy túrli sport túrinen kórsetilim taratyp, artylǵan senimdi aqaýsyz atqardyq dep oılaımyn. Endi jabylý saltanatyn sapaly berý arqyly bul oıyndarǵa ádemi núkte qoısaq dep otyrmyz. Úlken jobalar kez kelgen ujymdy shyńdaıdy. Osy turǵydan alǵanda bul oıyndar da bizdiń mamandarymyzdyń tájirıbesin arttyryp, ujymdy jumyldyra tústi», - deıdi ol.
Arna ujymy oıyndardyń ashylý jáne jabylý saltanatyn qosqanda 61 ret tikeleı efırden kórsetilim taratqan. Bul – 134 saǵat boıy úzilissiz jumys isteý degen sóz.
«Jibek Joly» ujymy Parıj Olımpıadasynyń ashylý saltanatyn Astananyń Ortalyq saıabaǵynda uıymdastyryp, 4 myń adamǵa esten ketpes qýanysh syılaǵan bolatyn. Al demalys saıyn «Abu-Dhabi Plaza» saýda-oıyn-saýyq ortalyǵynyń LED ekrandarynda tikeleı efır kórsetilimi berildi.
Osyndaı ólsheýsiz jumystyń arqasynda arnanyń saıtyna kirýshilerdiń sany da artqan. Tikeleı kórsetilimder kezinde arnanyń saıtyna 10 myńnan astam kirgen.
Eske salsaq, Parıj Olımpıadasynyń jabylý saltanaty Astana ýaqytymen saǵat 00.00-de bastalady. Ony «Jibek Joly» arnasynan tamashalaýǵa bolady. Telearna saltanatty sharanyń bastalýyn kútpesten oıyndardy qorytyndylaýǵa arnalǵan kórsetilimdi bastap ketti.