Bıyl álemdegi ınternet paıdalanýshylar sany 5,5 mıllıardqa jetedi

<p>ASTANA. KAZINFORM &mdash;Halyqaralyq elektr baılanys odaǵy (ITU) 27 qarasha kúni &laquo;2024 jylǵy derekter men faktiler&raquo; baıandamasyn jarııalady. Onda 2024 jyldyń sońyna qaraı álemdegi ınternet paıdalanýshylar sany 5,5 mıllıardqa jetetini boljanǵan, dep habarlaıdy <a href="https://www.chinanews.com.cn/gj/2024/11-28/10326939.shtml" target="_blank" rel="noopener">CNS</a> aqparat agenttigi.&nbsp;</p>

Baıandamaǵa sáıkes, bul kórsetkish álem halqynyń 68%-yn quraıdy. Degenmen, tsıfrlyq teńsizdik áli de saqtalýda, álem halqynyń úshten biri nemese shamamen 2,6 mıllıard adam «oflaın» kúıinde qalady.

Salystyrmaly túrde aıtar bolsaq, 2023 jyly 2,8 mıllıard adam ınternetke qol jetkize almaǵan, bul álem halqynyń shamamen 35%-yn qurady.

Halyqaralyq elektr baılanys odaǵynyń Bas hatshysy Dorın Bogdan-Martın «bul baıandamadan tsıfrlyq saladaǵy joǵary tabysty elder jáne tómen tabysty elder arasyndaǵy aıqyn aıyrmashylyqty baıqaýǵa bolady» dep atap ótti.

Sondaı-aq, 2024 jyly álem halqynyń 51%-yn 5G jelisi qamtıdy dep kútilýde. Alaıda, joǵary jáne tómen tabysty elder arasyndaǵy alshaqtyq aıqyn seziledi: joǵary tabysty elderde halyqtyń 84%-y 5G jelisine qol jetkize alsa, tómen tabysty elderde bul kórsetkish nebári 4%-dy quraıdy.

Osyǵan deıin Qazaqstannyń ınterneti eń arzan elder tizimine engeni týraly jazdyq.