2023 jyly Túrkistandy túrkitildes elderdiń týrıstik astanasy etý usynyldy

NUR-SULTAN. QazAqparat – Kelesi jyly Túrkistan qalasy túrkitildes elderdiń týrıstik astanasy bolýy múmkin. Bul týraly Mádenıet jáne sport vıtse-mınıstri Erjan Erkinbaev málim etti, dep habarlaıdy QazAqparat tilshisi.

«Túrkistan - elimizdegi týrıstik qarqyny joǵary óńirlerdiń biri. Qalanyń ınfraqurylymy jyl sanap damyp kele jatyr. Túrkistanǵa kóliktiń barlyq túri barady. Búginde atalǵan qalada respýblıkalyq jáne halyqaralyq aıtýly is-sharalar ótip jatyr. Ázerbaıjanda ótken túrkitildes elderdiń týrızmge jaýapty mınıstrleriniń kezdesýinde Qazaqstan 2023 jyly Túrkistan qalasyn túrkitildes elderdiń týrıstik astanasy etip jarııalaýdy usyndy. Bıyl túrkitildes elderdiń týrıstik astanasy – Baký», - dedi Erjan Erkinbaev tilshilerdiń suraǵyna jaýap berip.

Vıtse-mınıstrdiń aıtýynsha, bıyl Túrkistanǵa týrısterdi tartý maqsatynda birqatar aýqymdy sharalar ótkeli otyr.

«Jyl sońyna deıin josparlanyp otyrǵan is-sharalardyń formaty ártúrli. Onyń ishinde mádenı, týrıstik, sporttyq, oıyn-saýyqtar, taǵy sol sııaqtylar bar», - deıdi ol.

Buǵan deıin elordada týrısterge arnalǵan jańa jobanyń qolǵa alynǵany týraly habarlaǵan edik. «Neo Nomad 2022» aktsııasyna qatysýshy týrıst bir jyldyń ishinde elimizdiń 20 aımaǵyna baryp, arnaıy qoıylǵan jıektemeniń (ramka) aldynda sýretke túsýi tıis.

Osylaısha 20 fotosýret jınaǵan týrıstke «Zamanaýı kóshpendi» mártebesi berilip, estelik syılyq tabys etiledi.