2023 jyly týrızm pandemııaǵa deıingi deńgeıge qaıta oralady - UNWTO boljamy

BAKÝ. QazAqparat - BUU Dúnıejúzilik týrıstik uıymynyń (UNWTO) esebinshe, 2022 jyly 900 mıllıonnan astam týrıst halyqaralyq saıahatqa shyqqan, bul bir jyl burynǵy kórsetkishten eki ese kóp, dep habarlaıdy QazAqparat.

UNWTO jańartylǵan derekterine sáıkes jahandyq týrızm pandemııaǵa deıingi deńgeıden 63% qalpyna kelgen. Sonymen qatar, halyqaralyq týrıster sanynyń ósýi álemniń ár elinde ártúrli.

«Eń joǵary ósim Taıaý Shyǵysta baıqaldy, munda kelýshiler sany 83%-ǵa deıin ósti, ekinshi orynda Eýropa, onda halyqaralyq týrızm 2019 jyly pandemııaǵa deıingi deńgeıdiń 80% derlik qurady. Eń tómengi ósim Azııa-Tynyq muhıty aımaǵynda baıqaldy, munda karantındik shekteýlerdiń kúsheıtilýine baılanysty kórsetkish nebári 23%-dy qurady», - dep habarlaıdy UNWTO.

Uıym ekonomıkalyq qıyndyqtar men geosaıası qıyndyqtarǵa qaramastan, halyqaralyq týrızmdi qalpyna keltirý 2023 jyl boıy jalǵasady dep boljaıdy.

Sondaı-aq qujatta bul salada kóp másele qytaılyq týrısterdiń saıahatyn qalpyna keltirýge baılanysty bolatyny atap ótiledi, óıtkeni QHR 2020 jylǵa deıin álem boıynsha týrızm naryǵyndaǵy eń iri el. Atap aıtqanda, ondaǵy týrızmniń qalpyna kelýi álemdegi, ásirese Azııa-Tynyq muhıty aımaǵyndaǵy týrızm sektorynyń qalpyna kelýine oń áser etedi.

UNWTO málimetinshe, Eýropa áli de AQSh-tan keletin úlken týrıstik aǵyndy paıdalanady. UNWTO-nyń 2023 jylǵa arnalǵan boljamdy stsenarıine sáıkes, AQSh dollaryna qatysty eýronyń álsireýine baılanysty bıylǵy jyly halyqaralyq týrıster sany pandemııaǵa deıingi deńgeıdiń 80-95% jetýi múmkin. Alaıda, bul ekonomıkalyq quldyraý dárejesine, Azııa-Tynyq muhıty aımaǵyndaǵy týrızmdi qalpyna keltirýdiń jalǵasýyna jáne Shyǵys Eýropadaǵy qaqtyǵystardyń damýyna baılanysty.