2023 jyly respýblıkalyq bıýdjet túsimderi 37 paıyzǵa artady

ASTANA. QazAqparat – 2023 jyly respýblıkalyq bıýdjet túsimderi 37 paıyzǵa artady. Bul týraly Senattyń jalpy otyrysynda eldiń 2023-2027 jyldarǵa arnalǵan áleýmettik-ekonomıkalyq damýynyń boljamy jaıynda baıandaǵan QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Respýblıkalyq bıýdjet pen Ulttyq qordyń josparly jyldarǵa arnalǵan parametrlerin qalyptastyrý barysynda Memleket basshysynyń únemdi jáne jaýapty bıýdjet saıasaty tujyrymdamasyn qamtamasyz etý boıynsha qoıǵan mindetteri iske asyryldy. 2023-2025 jyldarǵa arnalǵan respýblıkalyq bıýdjettiń parametrleri bıýdjet saıasatynyń kiris bazasyn tolyqtyrýdyń jańa kózderin jınaqtaý jáne bıýdjet shyǵystaryn áleýmettik-ekonomıkalyq damýdyń basym baǵyttaryna shoǵyrlandyrý baǵdaryn eskere otyryp aıqyndaldy», - dedi ol.

Álibek Qýantyrovtyń aıtýynsha, respýblıkalyq bıýdjettiń kiristeri 2023 jyly bıylǵy naqtylanǵan josparynan 37 paıyzǵa ósýmen jalpy ishki ónimge qatysty 11,5 paıyz deńgeıinde boljanady. Josparly kezeńde olardyń 2025 jylǵa qaraı 17,2 paıyzǵa ósýi kútiledi.

«Respýblıkalyq bıýdjetke qosymsha túsimder kiris bazasyn keńeıtý jáne salyqtyq ákimshilendirýdi jaqsartý, sondaı-aq kóleńkeli ekonomıkanyń úlesin azaıtý boıynsha Úkimetpen qabyldanyp jatqan is-sharalar esebinen qamtamasyz etiletin bolady», - dedi mınıstr.

Foto: nowblitz.com