2023 jyly «Oral-Atyraý» trassasy jóndeýden ótedi

NUR-SULTAN. QazAqparat – Bıyl Batys Qazaqstan oblysynda jol salý jáne jóndeý jumystaryna ótken jylmen salystyrǵanda 2 ese artyq qarjy bólingen. Bul týraly óńir ákimi Ǵalı Esqalıev Ortalyq kommýnıkatsııalar qyzmeti alańynda ótken baspasóz máslıhatynda aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes óńirde jol jóndeý jumystary qyzý júrip jatyr. Bıyl jol salý jáne jóndeý jumysyna 51 mlrd 200 mln teńge qarjy bólindi. Bul soma ótken jylmen salystyrǵanda 2 ese kóp. 600 shaqyrymnan astam joldy jóndeý josparlanyp otyr. Jyl sońyna deıin jergilikti joldardyń deńgeıin 39-dan 50 deıin jaqsartý josparlanǵan», - dedi Ǵalı Esqalıev.

Odan bólek, óńir basshysynyń aıtýynsha, 248 shaqyrymdy quraıtyn Ońtústik-Batys jolyna kúrdeli jóndeý júrip jatyr.

«QazAvtoJol ulttyq kompanııasynyń málimetinshe bıyl oblys kóleminde 174 shaqyrym jol paıdalanýǵa beriledi. Al jobany tolyq aıaqtaý 2023 jylǵa josparlanyp otyr. Sonymen qatar bıyl Oral qalasynan Reseıdiń Orynbor qalasyna deıingi avtokólik jolyna jóndeý jumysy bastalady. Joldyń uzyndyǵy 144 shaqyrymdy quraıdy. Sol sııaqty búginde «Oral-Atyraý» tasjoly boıynsha jobalyq-smetalyq qujat ázirlenip jatyr. Atalǵan joldyń bizdiń oblysqa qarasty aýmaǵy – 335 shaqyrym. Joldy jóndeý 2023 jyly qolǵa alynbaq», - deıdi ol.

Eske sala ketsek, bıyl Prezıdent uzaq jyldar boıy sheshilmeı kele jatqan Batys Qazaqstan oblysyndaǵy kúre joldar problemasyn kóterip, Úkimet pen aımaq basshysyna tapsyrma júktedi.

Sondaı-aq, taıaýda «QazAvtoJol» ulttyq kompanııasy BQO-daǵy salynyp jatqan joldardyń barysyn kórsetý úshin baspasóz týryn uıymdastyrǵan edi.