2023 jyly Qazaqstan-Ázerbaıjan baǵytynda Kaspıı túbi arqyly baılanys jelileriniń qurylysy bastalady

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Samarqanda Ortalyq Azııadaǵy telekommýnıkatsııa ındýstrııasynyń mańyzdy máselelerin talqylaýǵa qatysty, dep habarlaıdy QazAqparat mınıstrdiń jelidegi paraqshasyna silteme jasap.

«Samarqanǵa sapar barysynda telekommýnıkatsııa ındýstrııasynyń mańyzdy máselelerin talqyladyq. Qazaqtelekom basshylyǵy Baılanys salasyndaǵy óńirlik dostastyq ákimshiligi basshylarymen jáne ITU ókilderimen ınternet-alaıaqtyqtyń ósýine qarsy kúresti talqylaýǵa qatysty. Bul másele barlyq elder úshin ózekti jáne qatysýshylar bul máselemen birlesip kúresý týraly kelisimge keldi. Jasyratyny joq, alaıaqtar SIP-telefonııa múmkindikterin paıdalanady jáne qońyraýlar basqa elderdiń aýmaǵynan keledi. Áriptestermen birlesken is-qımyl josparyn ázirleý jáne baılanys salasyndaǵy óńirlik dostastyq ókilderimen kelise otyryp, osy máselerdi ITU (halyqaralyq telekommýnıkatsııa odaǵy) deńgeıinde kóterip, sheshý joldaryn qarastyrý qajet dep kelistik», - dep jazdy B. Mýsın.

Sondaı-aq osy jıynda Qazaqtelekom is-sharaǵa qatysýshylarǵa Ortalyq Azııada talshyqty-optıkalyq baılanys jelisin salý jobasyn tanystyrdy.

«2023 jyly Qazaqstan-Ázirbaıjan baǵyty boıynsha Kaspıı túbi arqyly talshyqty-optıkalyq baılanys jelileriniń qurylysy bastalady.

Joba Ortalyq Azııa elderine Internetke balamaly qoljetimdilikti qamtamasyz etýge, sondaı-aq Eýropa men Azııa arasyndaǵy trafık tranzıtin keńeıtýge múmkindik beredi.

Qazaqstan tarapynan jobanyń seriktesi Qazaqtelekom, Ázerbaıjan tarapynan - Azertelekom kompanııasy bolady.

Qazirdiń ózinde jobanyń dızaınyn (HLD) ázirleý jumystary bastaldy, sodan keıin tıisti zertteýler, keıinirek - Kaspıı túbindegi «optıkany» jobalaý jáne salý júzege asady.

Sý asty jelisiniń negizgi baǵyty Aqtaýdan Ázerbaıjannyń Sıazan qalasyna deıin ótedi jáne 340 shaqyrymdy qamtıdy, uzyndyǵy 330 shaqyrymǵa jýyq rezervtik kanal Baký mańyndaǵy qazaqstandyq Quryq portynan Ázerbaıjannyń Býzovna eldi-mekenine deıin salynady.

Ortalyq Azııanyń barlyq elderi jobany jaqyn arada iske asyrýǵa múddeli, óıtkeni balamaly marshrýttardyń bolýy bizdiń elderimizdiń turǵyndaryna Internetke kepildendirilgen qoljetimdilikti qamtamasyz etýde úlken ról atqarady», - dep tolyqtyrdy mınıstr.

Foto: facebook.com/BagdatMussin