2023 jyly IT-kompanııalarda 25 myń jańa jumys orny ashylady
«Azamattarǵa sapaly qyzmetterdi kórsetý úshin oblystyq jáne aýdandyq mańyzy bar qalalarda keń jolaqty Internetke qoljetimdilik qamtamasyz etiledi. Kelesi jyly IT-kompanııalarda 25 myń jańa jumys orny ashylady», - dedi Úkimet basshysy.
Onyń atap ótýinshe, memlekettiń, bıznestiń jáne halyqtyń tıimdi ózara is-qımyly úshin proaktıvti memlekettik servısterge kóshý júzege asyrylady. 1 qańtardan bastap Otbasynyń tsıfrlyq kartasy pılottyq rejımde iske qosylady. Ǵylymnyń damýyna serpin berý úshin tıisti 5 jyldyq ulttyq tujyrymdamasy qabyldandy.
«Bıyl ǵalymdardyń jalaqysy 2 esege ulǵaıtyldy. Jas ǵalymdardy qoldaý jáne yntalandyrý úshin 1000-nan astam grant bólindi, 400-den astam ǵalym álemdik ǵylymı ortalyqtarǵa stajırovkaǵa jiberildi. 3 jetekshi sheteldik zertteý joǵary oqý oryndarynyń fılıaldary ashyldy. Taǵy 2 fılıaldyń ashylýy pysyqtalýda. Kelesi jyly «Ǵylym jáne tehnologııalyq saıasat týraly» zań jobasy ázirlenedi», - dedi Álıhan Smaıylov.