2023 jyly elordada 9 mektep paıdalanýǵa beriledi

ASTANA. QazAqparat – Astana qalasy ákimi Jeńis Qasymbek qaladaǵy oqý oryndarynyń qurylys barysymen tanysty, dep habarlaıdy QazAqparat.

«Bıylǵy oqý jylynda taǵy 9 mektepti qoldanysqa beremiz. Máselen bul Rysqulov kóshesindegi, R.Qoshqarbaev dańǵylyndaǵy, Uly Dala dańǵyly men Saýran kóshesiniń qıylysyndaǵy, Uly Dala dańǵyly men №39 kósheniń qıylysyndaǵy jáne t.b. mektepter. Kóktemde irgeles aýmaqty abattandyrýǵa kirisýdi tapsyrdym. Aldaǵy oqý jylynda taǵy 13 mektep salamyz. Qalada iri mektepter salynyp jatyr. Mundaı mekteptiń árqaısysy 4 myń oqýshy ornyn (2 aýysymda) ashýǵa múmkindik beredi. Osylaısha oqýshy oryndaryna degen qajettilik máselesi edáýir sheshiledi», - dep jazdy qala ákimi jelidegi paraqshasynda.

Ákimniń sózine qaraǵanda Memleket basshysynyń tapsyrmasy boıynsha «Jaıly mektep» ulttyq jobasy aıasynda 100 myń oqýshy ornyna (2 aýysymda) arnalǵan jańa formattaǵy 25 mektepti jobalaý jumysy júrgizilýde. Jańa formattaǵy mektepterdiń qurylysyn 2023 jyly bastalmaq.

«Balabaqsha máselesine de kóńil bólemiz: jaqynda Esil aýdanynda (Kúltegin kóshesi) memlekettik balabaqsha ashyldy. Sol sııaqty keler jyly jeke balabaqshalarǵa 9 myń orynǵa arnalǵan qosymsha memlekettik tapsyrys ornalastyrýdy josparlap otyrmyz, osy arqyly balalardy mektepke deıingi bilimmen qamtý kólemin arttyramyz», - dedi ákim.

Foto: instagram.com/jenis_qasymbek