2023 jyly elimizde aýqymdy kólemde mektepterdiń qurylysy bastalady

ASTANA. QazAqparat – Búgin Úkimet otyrysynda elimizdegi bilim berýdi damytýdyń 2026 jylǵa deıingi tujyrymdamasyn talqylaý kezinde Oqý-aǵartý mınıstri Ashat Aımaǵambetov mektepterdegi oryn tapshylyǵyna toqtaldy, dep habarlaıdy QazAqparat tilshisi.

«Memleket basshysy «Jaıly mektep» ulttyq jobasyn iske asyrý jóninde tapsyrma berdi. Ulttyq joba aıasynda 2025 jyldyń sońyna deıin 800 myńnan astam oqýshy orny beriledi, bul úsh aýysymdy jáne apatty mektepter máselesin tolyǵymen sheshedi. Jańa mektepter úshin qurylys pen jaraqtandyrýdyń eń joǵary, zamanaýı jáne biryńǵaı standarttary qoldanylady. Kelesi jyly buryn-sońdy bolmaǵan kólemde mektepterdiń qurylysy bastalady», - dedi A. Aımaǵambetov.

Onyń aıtýynsha, 2023 jyly Almaty qalasy boıynsha ákimdikpen birge jańa 20 mekteptiń qurylysyn bastaý josparlanyp otyr. Osy oraıda 2024 jyly Almatyda 80 myń orynǵa arnalǵan mektepter salynyp, problema tolyǵymen sheshiledi.

«Astana qalasy boıynsha da dál osyndaı josparlarymyz bar», - dedi mınıstr.

Budan buryn habarlanǵandaı, balabaqshalarda balalardy erte damytýdyń jańa modeli engizilip jatyr. Osy oraıda ondaǵy baǵdarlama da, oqytý ádisteri da túbegeıli ózgeredi.

Sonymen qatar, mektepterge arnalǵan jańa memlekettik standarttar men oqý baǵdarlamalary ázirlenip jatyr.