2023 jyly álem elderinde azyq-túlik daǵdarysy bolýy múmkin – BUU

NUR-SULTAN. QazAqparat – 2023 jyly álem elderi azyq-túlik daǵdarysyna tap bolýy múmkin. Bul týraly QR Syrtqy ister mınıstrligindegi baspasóz máslıhatynda BUU Bas hatshysynyń birinshi orynbasary Amına Muhammed málim etti, dep habarlaıdy QazAqparat tilshisi.

«Ýkraınadaǵy jaǵdaıǵa baılanysty azyq-túlik qaýipsizdigi salasynda qaýip-qater bar. Degenmen azyq-túlik qaýipsizdigi salasyndaǵy máseleler barsha álemdegi pandemııa men lokdaýndardan bastaý alyp otyr. Sebebi indet saldarynan álem elderi arasynda ónimdi jetkizý tizbegi buzylǵan bolatyn. Al soǵys jaǵdaıy bul qıyndyqtardy ýshyqtyra tústi», - dedi A.Muhammed.

Onyń aıtýynsha, BUU Bas hatshysy men álem elderiniń kóshbasshylary jáne olardyń tehnıkalyq komandalary aldaǵy ýaqytta bolýy múmkin azyq-túlik daǵdarysyn eńserýge qatysty sheshimderdi usynyp jatyr.

«Qymbattap bara jatqan azyq-túlik baǵasyn túsirý úshin bıdaı tasymaly baǵytynda Qara teńizdegi qarym-qatynasty jandandyrý kerek. Alaıda bul daǵdarystyń mán-jaıyn durys túsingen jón. ıAǵnı, soǵys aıaqtalmasa, problemalardyń salmaǵy da aýyrlaı beredi. Bıyl azyq-túlik daǵdarysynyń saldaryn asa qatty sezinbesek te, aldaǵy jyly bul saladaǵy problemalar aýqymdy bolatynyn baıqaımyz», - dedi BUU Bas hatshysynyń birinshi orynbasary.

Aıta keteıik, Halyqaralyq Azyq-túlik jáne aýyl sharýashylyǵy uıymynyń basshysy Tsıýı Dýnıýı Ýkraınadan tasymaldanatyn júktiń qysqarýy Afrıka men Azııadaǵy azyq-túlik tapshylyǵy qaýpin kúsheıtetinin eskertti.

Budan buryn habarlanǵandaı, búgin Memleket basshysy Qasym-Jomart Toqaev Ortalyq Azııaǵa sapary aıasynda Qazaqstanǵa kelgen BUU Bas hatshysynyń birinshi orynbasary Amına Muhammedti qabyldady.

A. Muhammed Birikke Ulttar Uıymy Qazaqstanda júrgizilip jatqan reformalardy qoldaıtynyn atap ótti.