2023 jyly Abaı oblysynda aýyz sýmen qamtý boıynsha 33 joba iske asady
Bıyl Semeı qalasyndaǵy Berezovskıı, Lodochnyı, Murat, Polovınkı kenti men Almaty kóshesine sý qubyry tartylady. 2024-2025 jyldary Bobrovka, Voshod, Vodnyı, Zaǵıptar qoǵamy, Krasnyı kordon yqsham aýdandaryna sýmen jabdyqtaý jelileri salynady. «Qazirgi ýaqytta Abaı oblysynyń ortalyqtandyrylǵan sýmen qamtamasyz etilýi 91,9 paıyzdy quraıdy. Óńirdiń 327 eldi mekeniniń 138-i sapaly aýyz sýǵa qol jetkize almaı otyr. Oblys halqyn 2025 jylǵa deıin ortalyqtandyrylǵan sýmen 100 paıyz qamtamasyz etý úshin 52 jobany aıaqtaý qajet. 2023 jyly biz onyń 33-in salýdy jáne keıbir qoldanystaǵy jelilerdi qaıta iske qosýdy josparlap otyrmyz» deıdi Abaı oblystyq Energetıka jáne turǵyn úı kommýnaldyq sharýashylyǵy basqarmasynyń sýmen qamtý bóliminiń basshysy Quralaı Dúısenbaeva.
Qazirgi tańda oblys boıynsha sý qubyry jelileriniń ortasha tozýy 51 paıyzdy (Semeı qalasy - 66 %, Aıagóz qalasy - 65 %, Kýrchatov qalasy - 85%) quraıdy. Abaı oblysyn damytýdyń keshendi jospary sheńberinde 2025-2027 jyldary Semeı, Kýrchatov jáne Aıagóz qalalarynda káriz-tazartý qurylystaryn salý jáne qaıta jańartý kózdelýde.