2023 jylǵa qaraı Qazaqstanda munaı óndirý 100 mln. tonnaǵa jetýi múmkin

ASTANA. QazAqparat - 2023 jylǵa qaraı Qazaqstanda munaı óndirý jylyna 100 mln. tonnaǵa jetýi múmkin. Bul týraly búgin Parlament Májilisiniń Ekologııa jáne tabıǵatty paıdalaný komıtetiniń keńeıtilgen otyrysynda Energetıka mınıstri Vladımır Shkolnık málim etti.

«Qashaǵan» máselesine kelsek, qazirgi tańda konsortsıým operatory «Nort Kaspıan Opereıtıng» aǵymdaǵy jyldyń sáýir aıynda ken ornyndaǵy qubyrlardy tolyq aýystyrý qajettigin naqtylady. Soǵan oraı, qubyrlardy tolyq aýystyrý, sodan keıin munaı óndirýdi jańǵyrtý 2016 jyldyń ekinshi jartysyna nemese ary ketkende 2016 jyldyń sońyna qaraı kútiledi. Eger barlyǵy josparǵa saı bolsa, onda osy mezgilde ken ornynan munaı óndiretin bolamyz», - dedi V.Shkolnık.

Onyń aıtýynsha, keleshek jobalardy júzege asyryp, Teńiz ken ornyn keńeıtý jáne Qashaǵan kenin ıgerýdiń ornyqty deńgeıge shyǵýy elimizdiń munaı sektoryndaǵy pozıtsııasyn arttyra túsedi. Atap aıtqanda, 2023 jylǵa qaraı Qazaqstan jylyna 100 mln. tonna munaı óndirýge qol jetkize alady.

Toqtala ketetin jaıt, «Qashaǵan» jobasy boıynsha jóndeý-qalpyna keltirý jumystarynyń jalpy qunyn Merdiger kompanııa shamamen 1,6 mlrd dollarǵa baǵalaǵan, al balama nusqa boıynsha onyń quny 3,6 mlrd dollar bolyp otyr.